Glóðafeykir - 01.04.1989, Blaðsíða 31
GLOÐAFEYKIR
29
byggingarinnar. Var verkinu lokið sumarið 1950.
Allt frá því að mjólkursamlagið var stofnað hefur framleiðslan verið í
stöðugri þróun. En um 1970 hófst umræða um nauðsyn þess að
endurskipuleggja vinnsluna. Mjólkurinnlegg var þá orðið margfalt á
við það, sem var tuttugu árum áður. Keyptur var tíu þúsund lítra
tankur þetta ár og markar það upphaf endurskipulagningarinnar.
Tveimur árum seinna var ákveðið að setja upp gufuketil auk ýmissa
hagræðinga í rekstrinum. Keypt voru ný gerilsneyðingartæki, bæði
fyrir mjólk og rjóma. Tíu þúsund lítra sjálfhreinsandi skilvinda, tveir
60 þúsund lítra geymslutankar fyrir mjólk, kælitæki, þvottavél og 12
þúsund lítra ostatankur. Litlu síðar var hafrnn undirbúningur
tankvæðingar hjá bændum. Sumarið 1976 voru keyptir tveir tankbílar
frá Þýskalandi og byrjað að nota þá til mjólkurflutninga vorið eftir. En
það var 29. apríl 1977 sem fyrstu mjólkinni var dælt á tankbíl í Útvík.
Ekki leið á löngu þar til öll mjólk var flutt með tankbílum til
mjólkursamlagsins.
Fiskvinnsla
Fljótlega eftir að kaupfélaginu óx fiskur um hrygg fóru sjómenn á
Sauðárkróki að hvetja stjórn þess til að bæta erfiða aðstöðu til
fiskverkunar. Eftir að frystihúsið var reist 1928 opnuðust möguleikar á
að nota það fyrir fisk þann tíma, sem kjöt var ekki í því. Útgerð var að
aukast á Sauðárkróki og síldarsöltun að hefjast. Var lagt í ýmsan
kostnað til útgerðar næstu ár.
Arið 1938 var ákveðið að byggja beitu- og matvælageymslu og sama ár
var samþykkt að leggja 50 þúsund króna hlutafé í síldarverksmiðju.
Tveimur árum seinna tók hraðfrystihús til starfa. Þá var lagt fram
hlutafé í Útgerðarfélag Sauðárkróks, sem þá var nýstofnað. En þessi
fjárútlát báru lítinn ávöxt. Síldin hvarf og fískigöngur inn á
Skagafjörð stórminnkuðu. Almannarómur sagði um þessar mundir,
að Sauðárkrókur yrði aldrei útgerðarbær. Þetta átti þó eftir að
breytast.
Kaupfélagsstjórnin fjallaði oft um það á fundum sínum, hvernigauka
mætti atvinnuöryggi sjómanna og fiskverkafólks. Lagt var fram
hlutafé til reksturs togara í samvinnu við bæjarfélög á Norðurlandi.