Múlaþing: byggðasögurit Austurlands - 01.01.1985, Síða 61

STEFÁN BJARNASON
Velheppnuð kindaleit
Vorið 1937 byrjuðum við Þórunn Einarsdóttir heitkona mín og síðar
kona að byggja nýbýlið Birkihlíð í Skriðdai. Byggt var íbúðarhús,
heyhlaða og gripahús. Allar byggingar heldur af minni gerð, sem fyrst
og fremst orsakaðist af lítilli fyrirgreiðslu í lánamálum frá því opinbera.
En þrátt fyrir erfiðar aðstæður var komið upp húsum fyrir fólk og
fénað. En Birkihlíð átti eftir að verða eitt fallegasta býli landsins í
búskapartíð þeirra hjóna, Björns Bjarnasonar bróður míns og konu
hans Eluldu Emilsdóttur. Búseta okkar Þórunnar í Birkihlíð var ekki
nema eitt ár. Árið 1938 losnar Flaga í Skriðdal úr ábúð en þar bjó
Eymundur Einarsson bróðir Þórunnar. Eymundur varð bráðkvaddur
í janúar 1938. Ekkjan Sveinbjörg Magnúsdóttir stóð uppi með tvö ung
börn og aldraða tengdamóður, Sigríði Guðmundsdóttur. Samdist svo
um við Sveinbjörgu og tengdafólkið að við keyptum Flögu og að áður-
talið fólk yrði kyrrt. Svo flytjum við að Flögu 4. maí 1938. Var nú
Þórunn komin aftur heim á sitt fæðingar- og æskuheimili.
Faðir minn Bjarni Björnsson á Borg bauð mér að sjá um ærnar
mínar á sauðburði, en ég fór með ær Þórunnar norður að Flögu þar
sem þær voru landvanar.
Þessi formáli er til skýringar á næstum einstæðri kindaleit á jólaföstu
veturinn 1938, og hefst nú frásögnin:
Fyrsta haustið sem ég var í Flögu vantaði mig eina dilká af ánum
sem ég átti á Borg og var sleppt þar um vorið. Það var búið að ganga
þrjár löggöngur og fara í eftirleit á afréttirnar. Þessi ær var vön að
koma seint að á haustin og kom ýmist fyrir á Múlanum eða Geitdaln-
um. Eg var stundum að leiða hugann að því, hvort ég fengi ekki
hana Grettlu mína með gimbrinni að um haustið. Það er komin
jólafasta, kominn snjór og allt fé komið á hús. Svo er það að kvöldlagi
í björtu og stilltu veðri, að ég segi við fólkið: „Nú ætla ég að fara
inn á Múla á morgun og horfa eftir henni Grettlu minni.“ Það kom