Múlaþing: byggðasögurit Austurlands - 01.01.1993, Side 163

GUÐNÝ VIGFÚSDÓTTIR
Fyrr var í Fjarðarseli
í Norðurgötunni á Seyðisfirði, gegnt kirkjunni, stendur steinn með keng í. Á honum er
spjald með svohljóðandi áletrun:
,, Hestasteinn úr Fjarðarseli,
áningarstað ferðamanna
um Fjarðarheiði
fyrir bílaöld. ‘'
Bær þessi, Fjarðarsel, stóð þar sem leið lá á Fjarðarheiði inn af kaupstaðnum Seyðis-
firði, uppaf þar sem síðan er Fjarðarselsvirkjun, en byggð lagðist þar af um 1910.
Múlaþingi hafa borist minningabrot Guðnýjar Vigfúsdóttur frá Fjarðarseli, sem þar ólst
upp fyrir og um síðustu aldamót og birtast þau nú í tilefni af aldarminningu hennar.
Guðný var fædd í Fjarðarseli 19. nóvember 1893; dóttir hjónanna Vigfúsar Ólafssonar
og Elísabetar Ólafsdóttur sem þar bjuggu.
Á fullorðinsárum rak hún bú og útgerð með manni sínum, Hermanni Vilhjálmssyni frá
Hánefsstöðum í Seyðisfirði, á Hrauni, grasbýli niður af Hánefsstaðabæ, á árunum 1919 til
1942. Þá fluttu þau hjón í kaupstaðinn og áttu sér heimili á Austurvegi 11 þar til Hermann
dó 1967 að Guðný yfirgaf átthaga sína og bjó síðan hjá dóttur sinni í Reykjavík til dánar-
dægurs 20. ágúst 1984.
Móðir hennar, húsfreyjan og ekkjan úr Fjarðarseli, var á heimili hennar öll búskaparár
Guðnýjar þar til hún dó síðla árs 1963.
Miningarbrot þau sem hér birtast setti Guðný á blað um áttræðisaldur að áeggjan Gríms
heitins Helgasonar og vélritaði hann þau og mætti birting þeirra vera virðingarvottur við
minningu hans.
1 fórum Guðnýjar fannst einnig stutt frásögn manns hennar, Hermanns, af róðri sem
hann fór í á unglingsárum á Hánefsstöðum og þykir við hæfi að hún fljóti hér með. - H.Þ.
Dóttursonur Guðnýjar og Hermanns, Hjalti Þórisson, hefur búið þessi skrif móðurfor-
eldra sinna til prentunar.
Fyrirhugað var að efni, sem hann hefur tekið saman um forsögu kaupstaðarlands Seyð-
isfjarðar og Fjarðarselsbúið sérstaklega, birtist jafnframt, en af því getur ekki orðið þar
sem það hefur vaxið að umfangi umfram mörk Múlaþings.
Askrifendum Múlaþings er því hér boðið. að gerast áskrifendur að þessu efni í sérútgáfu
höfundar, sem væntanlega mun verða af fljótlega. Geta þeir gert það með því, að fylla út
meðsent áskriftartilboð og póstlegggja það.