Gerðir kirkjuþings - 2008, Side 3

3
Ávarp biskups Íslands, Karls Sigurbjörnssonar

Forseti Íslands, herra Ólafur Ragnar Grímsson; forsætisráðherra, Geir Haarde og frú;
dóms- og kirkjumálaráðherra, Björn Bjarnason; forseti alþingis; Sturla Böðvarsson,
þingfulltrúar og allir góðir gestir. Verið öll velkomin til hátíðarfundar Kirkjuþings þegar
minnst er hálfrar aldar afmælis Kirkjuþings og 75 ára afmælis Kirkjuráðs.

Kirkjuþing íslensku þjóðkirkjunnar kom fyrst saman 18. október 1958. Rúmum aldar-
fjórðungi fyrr, 11. október 1932, hafði Kirkjuráð tekið til starfa. Þess er einnig minnst í
dag að í ár eru tíu ár liðin síðan núgildandi lög tóku gildi sem skilgreina Þjóðkirkjuna sem
frjálst, sjálfstætt trúfélag og Kirkjuþing sem æðsta vald í málefnum hennar. Svo hér er
margs að minnast og þakka er við staðnæmumst við þessar mikilvægu vörður á vegi
Þjóðkirkjunnar til aukins frelsis og sjálfræðis og ábyrgðar.

Nærvera æðstu leiðtoga þjóðarinnar minnir á mikilvægi þessara tímamóta og á þau
traustu bönd sem eru milli þjóðar og kirkju. Það er þakkarefni. Nærvera fulltrúa erlendra
systurkirkna minnir á samfélag okkar innan almennrar kirkju og dýrmætt og mikilvægt
vinarþel. Við þökkum það. Við þökkum þeim sem leiddu kirkjuna, mörkuðu brautina og
vörðuðu þennan veg. Við þökkum þeim sem fyrr og síðar hafa gegnt þeim trúnaði fyrir
hönd kirkjunnar að sitja Kirkjuþing og ráða þar málum hennar og marka henni stefnu.
Við þökkum farsæla samleið ríkis og kirkju og þjóðar og kirkju að mótun menningar og
siðar í þessu landi. Og við treystum vor heit að taka höndum saman, þjóð og kirkja, að
hag og heill lands og lýðs á alvörutímum.

Við stöndum á tímamótum. Við minnumst leiðtoga og forystumanna kirkjunnar sem
horfnir eru frá oss. Tveir þeirra voru í forsæti Kirkjuþings og Kirkjuráðs um árabil og
mótuðu svip og starfsemi íslensku kirkjunnar.

Herra Bolli Gústavsson, vígslubiskup, lést 27. mars s.l., 72 ára að aldri. Herra Bolli var
vígslubiskup á Hólum árin 1991–2002. Hann lét víða til sín taka í félagsstörfum og í lista-
og menningarlífi landsmanna, ljóðelskur og listfengur fagurkeri, ritfær og orðhagur, eins
og bækur hans, ritgerðir, myndskreytingar og teikningar bera glöggt vitni. Sem
vígslubiskup beitti hann sér fyrir byggingu Auðunarstofu á Hólum sem er ein höfuðprýði
hins helga staðar. Hann var orðlagður prédikari og framganga hans í helgri þjónustu var
jafnan borin uppi af smekkvísi og virðingu. Eftirlifandi eiginkona hans er frú Matthildur
Jónsdóttir.

Dr. Björn Björnsson, prófessor, andaðist hinn 9. maí s.l., 71 árs að aldri. Hann sat á
Kirkjuþingi árin 1990-1994. Fræðimennska dr. Björns og atbeini að málefnum fjölskyldu
og félagsmála, lífssiðfræði og umhverfissiðfræði birtist í þingsstörfum hans og hefur
auðgað íslenska guðfræði, samfélag og kirkju. Auk kennslu og fræðastarfa átti hann
merkan þátt að uppbyggingu félagsvísinda á Íslandi og hins félagslega kerfis í Reykjavík.
Um skeið starfaði hann sem fræðslustjóri Biskupsstofu og bar þar ábyrgð á fræðslu og
kærleiksþjónustu Þjóðkirkjunnar og átti góðan þátt meðal annars að stefnumörkun
safnaðaruppbyggingar, svo og mótun fjölskyldustefnu. Eftirlifandi eiginkona hans er frú
Svanhildur Sigurðardóttir