Gerðir kirkjuþings - 2008, Qupperneq 7

7
Upphafsorð forseta Kirkjuþings, Péturs Kr. Hafstein

Herra forseti Íslands.
Forsætisráðherra, kirkjumálaráðherra, forseti Alþingis, biskup Íslands.
Kirkjuþingsfulltrúar og góðir gestir.

Verið öll hjartanlega velkomin til Kirkjuþings 2008 – á hálfrar aldar afmæli þess.

Ég býð sérstaklega velkomna okkar ágætu gesti frá systurkirkjunum á Norðurlöndum og í
Þýskalandi. Þeir eru: Gunnar Sibbmark forseti sænska kirkjuþingsins, Timo Sahi
varaforseti finnska kirkjuþingsins, Jens-Petter Johnsen framkvæmdastjóri norska
kirkjuráðsins, Paul Verner Skærved formaður samkirkjunefndar í Danmörku, Durita
Tausen fulltrúi stiftsyfirvalda í Færeyjum og Dorothea Kutter varaforseti kirkjuþings
lútersku kirknanna í Þýskalandi. Það er mikils virði að sjá þessa góðu gesti hér á meðal
okkar í dag og skynja það vinarþel og virðingu, sem kirkjurnar ytra sýna Kirkjuþinginu
og Þjóðkirkjunni íslensku á þessum tímamótum með því að senda fulltrúa sína til Íslands
til að fagna með okkur á 50 ára afmæli Kirkjuþings.

I especially welcome our distinguished guests from our sister churches in the Nordic
countries and in Germany. It is of great value to have you here amongst us today and to
feel the friendship and honour that your churches show our church by sending
representatives to Iceland to celebrate with us the fiftieth Anniversary of the General
Synod of the Church of Iceland.

Kirkjuþing kemur nú saman í skugga fráfalls tveggja biskupa Íslands, herra Ólafs
Skúlasonar og herra Sigurbjörns Einarssonar, og hefur þeirra verið minnst. Báðir voru
þeir forsetar á Kirkjuþingi í embættistíð sinni, eins og þá tíðkaðist, og báðir lögðu þeir
þinginu ómetanlegan skerf, sem hér skal sérstaklega þakkað.

Megi sú trúfesti fylgja störfum þessa Kirkjuþings, er endurómar svo í ljóðstöfum
Sigurbjörns biskups:

Minn Guð, sem varst og ert mér allt
og alla blessar þúsundfalt,
þú skilur hjartað, veilt og valt,
og mannsins mörgu sár.
Þú ber þinn kross og bætir allt
og brosir gegnum tár.

Nú verður gengið til dagskrár á þessum setningarfundi.