Gerðir kirkjuþings - 2008, Blaðsíða 33

33
Kirkjuráð samþykkti að skipa í starfshópinn sr. Elínborgu Sturludóttur, Margréti
Björnsdóttur, kirkjuþingsfulltrúa; Ingibjörgu Elsu Björnsdóttur, Jónu Bjarnadóttur og sr.
Halldór Reynisson, sem leiði starf hópsins.
Hópurinn hefur skilað Kirkjuráði tillögum að umhverfisstefnu ásamt greinargerð og
fylgja tillögurnar skýrslu þessari. Kirkjuráð telur rétt að fá frekari umfjöllun um málið
áður en það verður lagt fyrir Kirkjuþing.
19. mál. Þingsályktun um kaup og sölu fasteigna
Kirkjuþing 2007 samþykkir kaup á eftirtöldum fasteignum á starfssvæði Þróunarfélags
Keflavíkurflugvallar ehf:
1. Kapellu að Víkingabraut 775, byggðri 1985.
2. Íbúð í fasteigninni að Breiðstræti 672, merktri A, byggðri 1969.
3. Íbúð í fasteigninni að Breiðstræti 672, merktri B, byggðri 1969.
4. Íbúð í fasteigninni að Breiðstræti 672, merktri C, byggðri 1969.
Kirkjuþing 2007 samþykkir sölu eftirtalinna fasteigna:
1. Eignarhlutar Kirkjumálasjóðs í óskiptu landi Járngerðarstaða og Hóps í Grindavík.
2. Íbúðarhúss á jörðinni Prestbakka í Húnavatnsprófastsdæmi, ásamt hæfilegri lóð.
3. Kirkjuþing 2007 samþykkir að fasteignin Skálholt og sérgreindir eignarhlutar þar í
eigu Þjóðkirkjunnar verði þinglýst eign Kirkjumálasjóðs.
Fasteignasvið Kirkjuráðs hefur haft þessi mál með höndum og er þeim að mestu lokið,
þ.e. gengið hefur verið frá kaupum, sölu og þinglýsingum samkvæmt ályktuninni.
20. mál. Þingsályktun um niðurfellingu á gjaldtöku fyrir fermingarfræðslu og skírn
Kirkjuþing 2007 samþykkir að leggja til við kirkjumálaráðherra að gjaldskrá um
aukaverk presta samkvæmt lögum nr. 36/1931 verði breytt á þann veg að gjaldtaka fyrir
fermingarfræðslu og skírn verði felld niður frá og með 1. jan. 2009. Jafnframt verði
tryggt að kjör presta skerðist ekki við þessar breytingar.
Kirkjuráð óskaði eftir því að biskup ræddi við forsætisráðherra og dóms- og
kirkjumálaráðherra um þessa samþykkt Kirkjuþings. Kirkjuráð ákvað síðan að skipa
starfshóp um málið. Voru tveir fulltrúar Prestafélags Íslands í hópnum, þeir sr. Ólafur
Jóhannsson formaður félagsins og sr. Magnús Magnússon kjarafulltrúi þess. Þá var af
hálfu Kirkjuráðs sr. Halldór Gunnarsson, kirkjuráðsmaður. Fulltrúar Prestafélagsins
sendu fyrir hönd P.Í. Kjararáði erindi í lok mars sl. Þar var gerð grein fyrir samþykkt
Kirkjuþings og þess óskað að Kjararáð taki tillit til niðurfellingar gjaldtökunnar við
endurskoðun á launum presta. Málið er enn í vinnslu og hefur sr. Ólafur Jóhannsson,
formaður Prestafélags Íslands, leitt viðræður við ráðuneytið.