Gerðir kirkjuþings - 2008, Page 45

45
Allsherjarnefnd þakkar starfshópi um umhverfismál fyrir tillögu að umhverfisstefnu
Þjóðkirkjunnar. Allsherjarnefnd tekur undir að umhyggja fyrir umhverfinu sé hluti af
kristinni lífssýn. Í ljósi breytts ástands hvetur nefndin til að kirkjan greiði veg hófsemi,
ráðdeildar og virðingar fyrir sköpuninni, en vinni gegn gildismati sem leiðir til ofneyslu
og sóunar.

Allsherjarnefnd fagnar skýrslu nefndar um samband kirkju og fjölmiðla. Skýrslan er
gagnleg og tekur allsherjarnefnd undir þau orð skýrsluhöfunda að mjög margt hafi verið
vel gert í upplýsinga- og fjölmiðlamálum kirkjunnar á umliðnum árum.

Í skýrslunni er m.a. fjallað um áfalla- og viðbragðastjórn og eru þau mál í góðum farvegi.
Þá er fjallað um mikilvægi þess að kirkjan taki frumkvæði í samræðum á opinberum
vettvangi og geri sig gildandi í þeirri umræðu. Á þessum vettvangi þarf kirkjan að efla
starf sitt.

Vefir Biskupsstofu hafa eflst og eru mikilvæg tæki í boðun og fræðslu. Allsherjarnefnd
beinir því til Biskupsstofu að leggja aukna áherslu á efni sem nýtist og höfðar til barna og
unglinga.

Einn nefndarmaður var sammála nefndaráliti allsherjarnefndar að öðru leyti en því að
hann taldi rétt að fallið yrði frá áformum um uppbyggingu frístundabyggðar í landi
Skálholts.

Kirkjuþing afgreiddi skýrslu Kirkjuráðs með erftirfarandi

Ályktun
Kirkjuþing telur nauðsynlegt að koma þinglýsingum kirkjulegra eigna í viðunandi horf og
beinir því til Kirkjuráðs að þeim málum verði hraðað sem kostur er.

Kirkjuþing ályktar að skýra þurfi stefnu Fjölskylduþjónustu kirkjunnar og starfseminni
verði fundið hagstæðara húsnæði. Leitað verði eftir nánari tengslum við stofnanir og
starfsfólk kirkjunnar um land allt til að styrkja þjónustu og rekstrargrundvöll.

Kirkjuþing beinir því til Kirkjuráðs að lokaskýrslu um árangursmat í kirkjustarfi verði
komið í viðeigandi farveg í tengslum við endurskoðun á heildarþjónustu kirkjunnar.

Kirkjuþing telur æskilegt að starfshópur vinni áfram að mótun umhverfisstefnu
Þjóðkirkjunnar og að umhverfisverkefnum sem kynnt voru með skýrslu Kirkjuráðs 2008.
Umhverfisstefna Þjóðkirkjunnar verði til afgreiðslu á Kirkjuþingi 2009.

Kirkjuþing ályktar að ráða þurfi upplýsingastjóra Þjóðkirkjunnar í fullt starf, og vísar til
tillögu nefndar um samband kirkju og fjölmiðla í því sambandi. Leitað verði leiða til að
forgangsraða í fjárhagsáætlun kirkjunnar þannig að finna megi þessu stað.