Tímarit Máls og menningar - 01.05.2018, Page 2

2 TMM 2018 · 2
Frá ritstjóra
Enn minnumst við Þorsteins frá Hamri í þessu hefti eins og því síðasta.
Skáldin Ólafur Jóhann Ólafsson og Anton Helgi Jónsson tileinka honum ljóð
og Guðmundur Andri Thorsson skrifar greinina „Brýr og himnar“ um skáld-
skap hans. Þorsteins verður lengi saknað en huggunin er sú að fjársjóðinn
sem hann skildi eftir sig eigum við meðan tungan er töluð.
Í heftinu er mikið bókmenntaefni, ljóð, sögur, greinar og gagnrýni. Sér-
staklega vil ég benda á grein Snorra Páls, „Mitt í merkingarkrísunni – um og
í kringum 11. september og Aftur og aftur eftir Halldór Armand Ásgeirsson“.
Saga Halldórs hefst á þessum örlagaríka degi og Snorri Páll víkkar sýn okkar
á hann og þar með skáldsöguna á athyglisverðan hátt.
Einhverjum lesanda fannst skjóta skökku við að hafa mynd af Jesúbarninu
með stjúpföður sínum á kápu fyrsta heftis ársins; Tímaritið hefði aldrei
verið sérstaklega kristilegt. Það hefur held ég aldrei verið neitt sérstaklega
á móti kristindómi heldur og allra síst hans fallegasta tákni. En nú skreytir
kápuna sjálf ástargyðja norrænnar heiðni, Freyja, eins og sænski myndlistar-
maðurinn Anders Zorn (1860–1920) sá hana. Málverkið er frá 1901 og er
meðal þekktustu verka hans. Það skreytir kápuna í tilefni þess að í heftinu
er grein um Brísingamen eftir Hallfríði J. Ragnheiðardóttur en þá frægu
dverga smíð þráði Freyja svo heitt að hún svaf hjá smiðunum öllum fjórum
til að eignast það, segir í Sörlaþætti í Flateyjarbók.
Silja Aðalsteinsdóttir