Tímarit lögfræðinga - 01.04.2012, Qupperneq 73


með vísan til forsendna dómsins. Verður hér að neðan vikið nánar
að þeim atriðum sem héraðsdómur byggði á í forsendum sínum
fyrir niðurstöðu um sakfellingu.
a) Kauptilboðin viku verulega til hækkunar frá fyrirliggjandi
tilboðum
Fyrir dómi bar B, sérfræðingur hjá Kauphöllinni vitni. Í framburði
hans kom fram að viðvörunarkerfi Kauphallarinnar hefði gefið
merki við tvö síðustu kauptilboðin en með réttu hefði viðvörun átt
að koma fram vegna allra tilboðanna sex. Tilgangur með viðvör­
unarbjöllum er að gefa merki ef eitthvað á sér stað sem er frábrugð­
ið öðru á markaðinum. B kvað stillingu viðvörunarkerfisins hafa
gert það að verkum að viðvörunarbjöllurnar hringdu ekki vegna
kauptilboðanna sem ekki var tekið. Um þetta segir í dómi héraðs­
dóms:
Með því sem nú hefur verið rakið, og með öðrum gögnum málsins, þar á
meðal með vitnisburði [B…], og er hafður er í huga tilgangur kauptilboð­
anna, sbr. það sem síðar verður rakið, er sannað, gegn neitun ákærðu, að
kauptilboðin viku verulega til hækkunar frá fyrirliggjandi kauptilboðum í
viðskiptakerfinu, eins og í ákæru greinir.
Héraðsdómur slær hér föstu að kauptilboðin sex hefðu verið
verulega frábrugðin fyrirliggjandi kauptilboðum. Til stuðnings nið­
urstöðu sinni vísaði héraðsdómur til ofangreinds vitnisburðar
starfsmanns Kauphallarinnar og tilgangs kauptilboðanna, en vikið
verður að tilganginum í b­lið hér að neðan. Með því að slá þessu
föstu virðist dómurinn vera að leggja grunn að niðurstöðu sinni um
að tilboð miðlarans hafi gefið eftirspurn og verð bréfanna misvís­
andi til kynna, sbr. orðalag a­liðar 1. tl. 1. mgr. 117. gr. vvl. Með
öðrum orðum virðist dómurinn líta þannig á að þar sem tilboðin
voru óvenjuleg, þ.e. ekki í samræmi við önnur tilboð í sömu bréf,
bendi það til þess að tilgangurinn hafi verið annar en sá að hagnast
á viðskiptunum.
b) Tilgangur tilboðanna
Eins og kom fram hér að ofan voru öll kauptilboðin sett inn við lok­
un markaðar. Í hljóðrituðum símtölum ákærðu kom fram að þeir
ræddu ítrekað um að setja kauptilboðin inn við lokun markaðar.
Dómurinn taldi sannað að tilgangurinn með kauptilboðunum hafi
verið sá að hafa áhrif á dagslokaverð skuldabréfaflokksins. En hvaða
hagsmunir skyldu liggja að baki því að hækka dagslokaverðið í
þessum tiltekna skuldabréfaflokki?