Múlaþing: byggðasögurit Austurlands - 2020, Page 112

111
Tíminn líður og það sem við lifum í dag gleymist á morgun. Margt af því er þó þess
virði að það varðveitist, verði ekki gleymskunni að bráð.
„Kynslóðir koma – kynslóðir fara“. Eftir liggja óljósar slóðir úr fortíðinni sem við öll
viljum reyna að halda til haga, auka þekkingu okkar á því sem forfeðurnir höfðust að.
Þó er nú svo að aðeins fáum okkar auðnast að skilja eftir okkur slíka þekkingu.
Hæfileikana skortir, viljann, aðstæðurnar. Allt verður þetta til þess að við núlifandi og
börn framtíðarinnar vitum afar lítið um það sem liðið er.
Múlaþing hefur frá upphafi gegnt því mikilvæga hlutverki að halda til haga brotum
úr byggðasögu Austurlandsfjórðungs. Óhætt er að fullyrða að margt af því sem ritið
hefur birt hefði annars horfið í haf minninga þeirra sem síðan hurfu úr þessum heimi.
En Múlaþing hefur frá upphafi þrifist á nokkrum bjargvættum sem hafa haldið til
haga fróðleik úr fortíð, ýmist úr eigin minningasjóði eða af því sem þeir hafa heyrt og
munað af eldri ritum eða úr munnlegri geymd.
Einn af þessum bjargvættum var Ingimar Sveinsson á Djúpavogi, en hann lést á
Dvalarheimilinu Uppsölum á Fáskrúðsfirði þann 29. maí 2020 á 94. aldursári.
Ingimar var fæddur á Hálsi í Hamarsfirði og mestalla starfsævina var hann kennari
og skólastjóri í heimabyggð sinni á Djúpavogi. Hann mun snemma hafa lagt sig eftir
því að halda til haga fróðleik um fyrri tíð auk þess sem hann skráði ýmislegt úr samtíð
sinni. Framlag hans til Múlaþings er drjúgt og óvíst að margt af því hefði varðveist ef
hans hefði ekki notið við.
Auk fjölmargra greina sendi hann frá sér tvær bækur, 400 ár við voginn og Siglt
og róið um Eyjasund.
Auk áhuga á byggðasögu var Ingimar áhugasamur og margfróður um umhverfi og
náttúru í sinni heimabyggð. Var hann gjarna kallaður til leiðsagnar gestum sem vildu
kynnast hinu fagra og margbreytilega umhverfi þorpsins á Djúpavogi. Fór margur vel
nestaður úr slíkum leiðöngrum.
Með þessum fátæklegu orðum viljum við sem að Múlaþingi stöndum þakka mikil-
væg og vel framsett framlög Ingimars í ritið um leið og við væntum þess að einhverjir
verði til að feta í slóð hans við ritun fróðleiks úr fyrri tíð.
Sigurjón Bjarnason
Minningarorð
Ingimar Sveinsson
f. 19. júní 1927 - d. 29. maí 2020