Ársrit Ræktunarfélags Norðurlands - 01.01.1981, Page 2

af heyskap. Síðustu ár eystra vann Ölafur að búi Jóns bónda
á Egilsstöðum. Var þar stórbú á þeirra tíma mælikvarða (er
raunar enn) og fékk Ólafur nýja innsýn í búskap — staðfestu
þess að möguleikar í íslenskum landbúnaði voru miklir ef
þekking og dugnaður sitja í fyrirrúmi. Það var því eðlilegt
framhald í lífshlaupi Ólafs að hann fór til náms í búfræði —
fyrst á Hvanneyri en síðar til Kaupmannahafnar þar sem
hann lauk kandídatsprófi frá Landbúnaðarháskólanum vorið
1924.
Að námi loknu tók Ólafur við framkvæmdastjórastarfi hjá
Ræktunarfélagi Norðurlands, starf sem hann hafði raunar
fengið ári fyrr, meðan hann enn hafði eigi lokið sínu háskóla-
prófi. Ólafur segir svo sjálfur frá í ritgerð, að hann hafi í raun
ekki haft svo mikinn áhuga á þessu starfi —- vitað það helst
um þetta félag að það var í fjárhagskröggum og rak tilrauna-
stöð á Akureyri. En hvatning og meðmæli skólastjóranna á
Hólum og Hvanneyri, þeirra Páls Zophoníassonar og Hall-
dórs Vilhjálmssonar, segir hann á sama stað að mestu hafi um
það ráðið að hann sótti um þessa stöðu og fékk.
Svo fór og kemur e.t.v. ekki svo mikið á óvart að það tvennt
sem Ólafur vissi frekast um félagið og fyrr er nefnt varð hans
helsta úrlausnarefni í starfi. Honum tókst með atorku og
útsjónarsemi að koma fjárhag félagsins á réttan kjöl mjög
fljótlega og þó baráttan fyrir fjárhagslegu sjálfstæði félagsins
væri oft á brattann þá stóð félagið alltaf traustum fótum
meðan Ólafur stjórnaði og átti verulegar eignir þegar hús og
jarðir voru seldar 1963.
Þótt samviskusemi og dugnaður Ólafs væri hin öruggasta
trygging fyrir afkomu félagsins þá var þetta fjármálavafstur
ekki það sem hugur Ólafs beindist að. Það hitt sem hann hafði
um félagið fregnað —að það ræki tilraunastöð —var það sem
laðaði og heillaði. Á þessum árum er þó tilraunastarfsemi öll á
frumstigi hérlendis og sérdeilis í öldudal hjá Ræktunarfélag-
inu þegar Ólafur kemur þar til starfa. Tilraunastöð var víst
ekki nema pínulítið meira en nafnið. En hér varð fljótt
breyting á. Tilrauna- og rannsóknastörf voru hafin í allt
annað og æðra veldi en verið hafði og áður þekktist; bæði