Árbók Landsbókasafns Íslands - Nýr flokkur - 01.01.1987, Síða 36

36
BRÉF NOKKURRA FRÆÐIMANNA
Sem meðlimur Modern Language Association of America fæ ég
líka þess „Publications“, 4 hefti á ári. Það er víst heldur lítið í því riti,
sem interesserar Islendinga, en þó er margt nýtilegt í því. Ef þú vilt,
þá skal ég gjarna senda safninu það framvegis.
Þá hef ég líka „American-Scandinavian Review“ frá upphafi (14
bindi) og „Publications of the Society of Advancement of Scandinavi-
an Study“ (8 bindi). Hefur Lbsafnið þau tímarit? Ef ekki, skal ég
senda þetta til safnsins, og svo framhaldið eftir því sem það kemur út.
Ég þykist vita, að þú sért ekki reiður mér útaf grein minni í
Morgunblaðinu viðvíkjandi Bókmenntafélaginu. Ég hef lesið svar
þitt, og þykist ég hafa gefið þér tækifæri til þess að láta meðlimi
félagsins vita, hvernig annars tilhagar með þessi rit þess. Ég skrifaði
greinina vegna þess, að þessi rit koma þegjandi frá stjórninni ár eftir
ár, en við fjarlægu meðlimir að minnsta kosti vitum ekkert um, hvað
lengi þetta á að ganga, því að stjórnin birtir ekkert um framtíðaráætl-
anir sínar, - hún gerir það kannske á félagsfundi, en þangað koma
fæstir. Ég nenni ekki að skrifa neitt frekar um þetta, því að ég ætlaði
ekki að fara í neina ritdeilu. En þetta með Fornbréfasafnið er hneyksli
næst, og ætti fyrir löngu að vera búið að breyta. Þú segir það kosti
ekkert félagið; að vísu ekki, en landið borgar brúsann, og það væri
betra og fyllilega nóg að prenta 500 eintök af því á góðan, varanlegan
pappír heldur en að fleygja þúsundum eintaka út um allt land á
miðlungi góðan pappír, sem víst er ekki endingargóður. En það sem
aðallega má finna fyrrverandi stjórnum félagsins til foráttu er, að þær
hvað eftir annað hafa verið að fitja upp á ritum, sem engan endi sá
fyrir á, og í öðru lagi hafa þær tekið rit höfunda án þess að takmarka
þau við arkafjölda, og svo hafa þeir spunnið lopann í það óendanlega
eins og Þorvaldur Thoroddsen gerði með Landfræðissöguna, og það
mun bezt að hafa gætur á Gubba og Hólakirkju, ef vel á að vera.
En þar sem ég minntist á útlenda bókmenntasögu, gleymdist mér
að geta þess, að íslenzka bókmenntasagan stendur nær, og getur
félagið ekki gefið út eitthvað eftir Sigurð Nordal þar að lútandi?
Með beztu óskum og kærri kveðju,
þinn einlægur
Halldór Hermannsson
hafa gœtur á Gubba og Hólakirkju: á Guðbrandi Jónssyni og verki hans um
Hóladómkirkju, er út kom á árunum 1919-29, á 5. hundrað blaðsíður.