Iðunn : nýr flokkur - 01.12.1929, Blaðsíða 64
386
Ungir rithöfundar.
IÐUNN
strákur úr Mosfellssveitinni, sem þá var þegar orðinn
þjóðkunnur rithöfundur.
Þessi strákur var Halldór Kiljan Laxness.
Halldór Kiljan Laxness er nú ásamt Þórbergi Þórð-
arsyni sá annar af hinum yngri rithöfundum íslenzkum,
sem mest veður stendur um, og það er því ekki af
neinu samsæri okkar strákanna úr Mosfellssveitinni gegn
áðurnefndum dómi vísindanna um okkur, að ég mælist
til einhvers af rúmi »Iðunnar« undir nokkur orð um
hann, heldur af því, að bæði hann og þjóðin eiga rétt
á því, að hans sé hvarvetna þar getið, er rætt er um
íslenzka rithöfunda, að minsta kosti hina yngri. Hann
hefir nú hlotið þá viðurkenningu, að við hann hefir þegar
verið kent hið nýjasta bókmentatímabil, og það er ekki
honum að kenna og rýrir ekki gildi hans, þótt heim-
færðir hafi þá verið af skakksýni til ritlistarsviðs hans
menn, sem eldri eru en hann og ekki eiga þar heima.
Hitt er sjálfsagt rétt, að úr þessu er alveg óhætt að
fara að tala um »kiljanskan« skáldskap og »kiljanskt«
bókmentatímabil með Islendingum, því að þótt ekki til-
heyri því enn þá nema hann einn, þá liggur þegar eftir
hann, þótt hann sé ekki nema tuttugu og sjö ára að
aldri, svo mikið, að líklegt er, að hann verði lengst af
öndvegishöldur síns tímabils, hversu margir eða miklir
sem leggjast í farveg hans.
Lesandanum þykir ef til vill óviðfeldið að fá ekki að
vita önnur upprunadeili á Halldóri Kiljan en það, að
hann sé úr Mosfellssveitinni. Er líklega rétt að gera
honum dálitla úrlausn um þetta, þótt það sé eiginlega
fyrir utan efni þessarar greinar. Halldór er þá fæddur
23. apríl (eins og Shakespeare og Cervantes) árið 1902
að Laugavegi 32 hér í Reykjavík og sonur Guðjóns
Helgasonar vegagerðarverkstjóra og konu hans Sigríðar