Morgunn - 01.06.1965, Page 44

38
MORGUNN
þrek í þeirri björtu trú og von, að lífið sé þrátt fyrir allt
sterkara en dauðinn, persónuleiki mannsins haldi áfram að
vera til, eftir að jarðlífinu lýkur, og starfa á æðra og full-
komnara sviði tilverunnar. Þetta er og hefur frá elztu tíð
verið meginkjarni allra helztu trúarbragða veraldarinnar.,
enda þótt það komi þar fram með mismunandi hætti og
kenningarnar séu að ýmsu leyti ólíkar varðandi einstök
atriði.
Til eru þeir menn, sem halda því fram, að ekki sé unnt og
aldrei verði unnt að ganga fyllilega úr skugga um það, hvort
framhaldslíf einstaklingsins eftir líkamsdauðann sé til eða
ekki til. Um það atriði verði aldrei hægt að afla óyggjandi
sannana. Ailar bollaleggingar um þau efni hljóti því að
byggjast á trú, og trúnni eingöngu. Af þessu leiði, að mann-
kynið hljóti að því er þetta varðar að skiptast í tvo hópa: þá,
sem trúa á framhaldslífið og hina, sem ekki gera það.
Báðir hafi jafnan rétt til þess að trúa því, sem þeim finnst
trúlegast. Það sé þeirra einkamál að öllu leyti.
Þetta sýnist í fljótu bragði vera áferðarfallegt og engan
veginn óskynsamlegt. En við nánari athugun koma þó veil-
urnar býsna skýrt í Ijós.
Að vísu má með nokkrum sanni segja, að trú mannsins og
trúarskoðanir séu einkamál hans, og sama máli gegnir um
hugsanir hans og skoðanir einnig á öðrum sviðum. Þess
vegna tryggja siðuð þjóðfélög þegnum sínum trúfrelsi og
skoðanafrelsi í sjálfri stjórnarskránni. Hins vegar liggur það
í augum uppi, að trú og skoðanir móta líf mannsins og
breytni að verulegu leyti og hefur sín áhrif á samskipti hans
við aðra menn og afstöðu til þjóðfélagsins. Það er því ekki
unnt að segja, að þetta komi honum aðeins einum við. Og
því er það hvorki sama fyrir manninn sjálfan né heldur
fyrir samfélagið, hverju hann trúir eða hvernig skoðanir
hans og lífsviðhorf eru. Hin svartsýna og neikvæða trú verk-
ar yfirleitt lamandi á manninn og dregur úr starfslöngun
hans og starfsgleði. Hin bjarta, jákvæða trú verkar hins veg-
ar styrkjandi og örvandi, eflir lífsgleðina og lífsþróttinn og