Uppeldi og menntun - 01.07.2011, Side 21

Uppeldi og menntUn/icelandic JoUrnal of edUcation 20 (2) 2011 21
gUðbJörg pálsdóttir og ólöf bJörg steinþórsdóttir
Verkefni eiga að vera mátulega erfið, þannig að sigur vinnist. Það hefur mikil áhrif á
andlegu heilsuna hvernig þú lítur á þetta. Meira gaman að vinna sigur, mjög afger-
andi í stærðfræði, ekki eins mikið í öðrum fögum.
Mér finnst skemmtilegast að vinna verkefni sem eru í þeim kantinum að maður þarf
að hugsa smá en eru ekki of erfið, þau leysast eftir smá tíma þegar maður er búinn að
pæla í þessu. Ég læri mest af þess konar verkefnum, þar sem þarf að nota heilann við
en ég skil samt á endanum. Maður leggur sig allan fram við slík verkefni.
Almennt virðast viðmælendur hafa notið stærðfræðináms síns, sérstaklega þar
sem kennarinn var að þeirra skapi. Þeir telja stærðfræðinám mikilvægt og hluta af
almennri menntun. Þeir eiga erfitt með að draga fram hvers vegna það er mikilvægt
að læra meiri stærðfræði en kennd er í grunnskóla en eru samt alveg vissir um þörfina
fyrir stærðfræðinám.
Kynjamyndir
Áberandi reyndist hve sterkar staðlaðar kynjamyndir komu fram í orðræðu viðmæl-
enda okkar. Hér er ekki greint frá því hvort ummælin eru frá drengjum eða stúlkum
þar sem markmiðið er að lýsa því hvernig orðræðan er kynjuð fremur en að bera
saman hugmyndir drengja og stúlkna.
„Stelpur samviskusamar – strákar latir“
Jafningjahópurinn var algengt umræðuefni þegar rætt var um áhrifaþætti á náms-
árangur í stærðfræði. Viðmælendur voru almennt sammála um mikilvægi jafningja-
hópsins og áhrif hans á einstaklinginn.
Í orðum viðmælenda mátti greina sterkar staðalímyndir um kynin í skóla og námi.
Almennt töldu viðmælendur okkar að stúlkur væru samviskusamari en drengir og
kom það fram í lýsingum þeirra. Annars vegar var stúlkum gjarnan lýst á þennan
veg: „Í mínu umhverfi eru stelpurnar miklu samviskusamari og sýna meiri áhuga á
að gera vel og áhuga á að læra og hlusta á kennara“ eða „í mínum skóla voru flestar
stelpur mjög duglegar að læra“. Drengjunum var hins vegar lýst á eftirfarandi hátt:
„Strákar eru frekar latir“ eða „strákarnir eru meira kærulausir, meira sama og minna
skipulagðir“.
Hugmyndin um jafningjahópinn sem þrýstihóp var dregin fram með því að bera
saman stúlkur og drengi. Almennt voru viðmælendur sammála um að þrýstingurinn
frá jafningjahópnum færi eftir því hvort um væri að ræða drengjahóp eða stúlknahóp:
Félagsmótun og gildi samfélagsins á þessum árum er að strákar eru bara harðir
gaurar en stelpur eru miklu þægari, ég held að það smiti út frá sér. Í mínum skóla var
ekki töff að reikna eða læra.
Lífleg umræða skapaðist í mörgum hópviðtalanna um „klíkur“ innan skólanna og
mismun á stórum og litlum skólum. Viðmælendur töldu almennt að ólíkt andrúmsloft
væri í skólum og þar réði stærð miklu um breytileika viðhorfa: