Uppeldi og menntun - 01.07.2011, Side 26

Uppeldi og menntUn/icelandic JoUrnal of edUcation 20 (2) 201126
raddir Ungs fólks Um stærðfræðinám
hugmyndir um hvað þær vilja taka sér fyrir hendur. Þetta er í samræmi við það sem
kom fram hjá viðmælendum. Þeir töluðu jafnframt um að drengir hafi meira frelsi
og að foreldrar hafi minni áhyggjur af því hvað þeir aðhafist. Rannsóknir á högum
og líðan ungs fólks sem Rannsóknir og greining hafa gert á undanförnum árum (sjá
t.d. Álfgeir Logi Kristjánsson, Margrét Lilja Guðmundsdóttir, Hrefna Pálsdóttir, Inga
Dóra Sigfúsdóttir og Jón Sigfússon, 2008; Margrét Lilja Guðmundsdóttir, Álfgeir Logi
Kristjánsson, Inga Dóra Sigfúsdóttir og Jón Sigfússon, 2007) sýna sömu niðurstöðu
hvað varðar kynjamun á stuðningi og samveru með foreldrum. Margar skýringar eru
hugsanlegar á þessum mun, m.a. menntunarkröfur á hinum kynskipta vinnumarkaði
og hefðbundið hlutverk kvenna í fjölskyldum.
að lokum
Meginniðurstaða greiningar okkar á rannsóknargögnunum er að viðmælendur segja
sömu sögu og gefa mynd af hefðbundinni stærðfræðikennslu þar sem ekki er ýtt
undir rannsóknir og sjálfstæða hugsun í stærðfræðináminu og hefðbundinni náms-
hegðun kynjanna er viðhaldið. Fram kemur að margir áhrifaþættir spila saman og
að viðmælendur eru almennt sáttir við þá stærðfræðikennslu sem þeir hafa fengið.
Hugmyndir þeirra um það hvernig stærðfræðinám getur farið fram mótast af reynslu
þeirra af einsleitum kennsluaðferðum og þröngum skilningi á því í hverju stærðfræði-
nám geti falist. Þeir líta á þrautalausnanálgun og opin verkefni sem tilbreytingu en
telja að alvöru stærðfræðinám felist í að ná valdi og skilningi á aðferðum við að leysa
ýmis stærðfræðileg viðfangsefni.
Hin staðlaða kynímynd lifir góðu lífi meðal viðmælenda. Hún hefur sterk áhrif á
hugmyndir þeirra og væntingar til drengja og stúlkna í eigin hópi og þeirra sjálfra.
Viðmælendur okkar líta þannig á að almenn viðhorf í samfélaginu séu mjög kynskipt
og að þau hafi mikil áhrif á hugmyndir og viðhorf stúlkna og drengja. Þó að viðmæl-
endur okkar séu almennt sterkir námsmenn og þeim standi í raun allir möguleikar
opnir hafa kynjaviðhorfin sterk áhrif á val þeirra og ákvarðanir. Viðmælendur líta
þannig á að þeir hafi frelsi en eru samt meðvitaðir um áhrif hefðbundinna kynhlut-
verka í samfélaginu. Meginniðurstaða rannsóknarinnar er að viðmælendur okkar
gera sér grein fyrir áhrifum námsumhverfis og viðhorfa á stærðfræðinám og mikil-
vægi stærðfræðikennarans.
Spurningar hafa vaknað um ýmsa þætti sem vert væri að rannsaka nánar. Má þar
nefna: Hvernig er námsumhverfið í stærðfræðikennslu? Hvaða reynslu af stærð-
fræðinámi fá nemendur tækifæri til að afla sér? Hvaða skilaboð fá nemendur frá sam-
félaginu um æskilega námshegðun? Hvernig hefur baráttan fyrir jafnrétti kynjanna
skilað sér inn í skólastofuna? Í hverju felst kynjamunur í námsaðferðum? Hvað eiga
nemendur við þegar þeir tala um skilning á stærðfræði? Ýmsar rannsóknir hafa verið
gerðar sem gætu lagt til gögn og niðurstöður sem nota mætti til að svara að hluta til
spurningum okkar en lítið er til af íslenskum rannsóknum og því væri áhugavert að
gera fleiri rannsóknir og skoða þá félags- og menningarlegu þætti sem hafa afgerandi
áhrif á það hvernig nemendur takast á við nám sitt.