Sagnir - 01.06.2009, Qupperneq 7

Sagnir, 29. árgangur
Ritstjórnarpistill
29. árgangurSagna:
Tfmarit á tfmamótum
29. árgangur Sagna, tímarits um sögulegt efni, liggur nú fyrir í allri sinni dýrð. Ekki er hægt að skauta framhjá þeim
mikla drætti er varð á þessari útgáfu og vill ritnefndin með vinsemd og virðingu biðja dygga lesendur og áskrifendur,
sem og höfunda efnis, innilegrar afsökunar á því. En að endingu varð 29. árgangur að veruleika og birtist hér alskapaður.
Ritstjórn setti sér í upphafi háleit markmið um að taka nokkurs konar hugmynda- og hugarfarssögupól í hæðina og birta
greinar á því sviði sagnfræðinnar. Þó eitthvað hafi verið brugðið af þeirri stefnu eru flestar greinarnar á einhvern hátt
tengdar hugmyndasögunni. Þannig er að finna greinar sem fjalla um hugmyndir um svo ólík atriði sem fóstureyðingar
og sjálfsákvörðunarrétt þjóða, femínisma og landfriðun. Einnig eru nokkrar greinar sem snerta á trúmálum og ein
sem grefst fyrir um goðsögnina um þjóðarsáttina. Að vanda er meirihluti greinanna unninn upp úr BA verkefnum
höfunda. Eru höfundum hér með færðar þakkir fyrir þeirra framlag til útgáfunar.
Nú þegar Sagnir nálgast óðum fertugsaldurinn má varpa þeirri spurningu fram á hvaða vegferð þetta merkilega tímarit
er. Augljóst er að vettvangur þessi hefur verið nauðsynlegur ungum sem heldri sagnfræðinemum á þroskaferli sínum
á ritvellinum og hefur fyrir marga verið fyrsta skrefið af mörgum á góðum ferli. Undanfarin ár hefur fyrirkomulag
útgáfunnar verið slíkt að blaðið hefur verið undir alræði ritstjórnar í eitt ár, sem síðan skipar næstu ritstjórn. Upp hafa
komið hugmyndir um annað fyrirkomulag. Einn möguleiki væri til dæmis að færa blaðið á ny undir hatt Fróða, félags
sagnfræðinema. Annar væri að „þjóðnýta“ útgáfuna, svo að segja, með þvi að færa hana inn í námskeið í sagnfræði-
og heimspekideild, þar sem nemendur sem á því hefðu áhuga fengu reynslu af útgáfumálum. Síðan er að sjálfsögðu
sá möguleiki fyrir hendi að halda áfram á þeirri braut sem blaðið er, enda hefur það að mestu gefist vel, og verið
lærdómsríkt fyrir alla þá sem að því hafa komið. En blaðið stendur á tímamótum, og því er vert að velta upp þessum
spurningum - við leyfum þeim sem síðar koma að eiga svarið.
Njótið vel!
Heiðar Lind Hansson
Kristín Svava Tómasdóttir
Sölvi Karlsson
Ritstjórn Sagna á góðri stundu