Glóðafeykir - 01.04.1989, Side 27

GLÓÐAFEYKIR
25
sem þá var nefnd „Uppsalir”. Árið 1913 var húsið síðan selt til að
bjarga félaginu frá gjaldþroti.
Um og eftir 1918 fer að rofa aftur til hjá félaginu. Má í því sambandi
vitna í fundargerð aðalfundar frá 22. febr., 1918, en þar segir:
,,Samþykkt að auk hinna venjulegu vörupantana deilda, hafí
félagsstjórnin heimilid til að panta nauðsynjavöru þ.á.m.
nauðsynlegar smávörur til skiptingar meðal félagsmanna, eftir
sérstakri pöntun”. Þá var samþykkt, að verðlag á öllum aðfluttum
vörum félagsins ,,sé sem næst verðlagi samskonar vara hjá
kaupmönnum í grenndinni, og um áramót sé verslunarágóðanum að
frádregnu ákveðnu hundraðsgjaldi til kaupfélagssjóðs skipt með
félagsmönnum, eftir skuldlausum viðskiptum þeirra við félagið og sé
helmingur ágóðans útborgað, en hinn helmingurinn lagður í stofnsjóð
í vörslu félagsins. Þó sé alltaf einhver hluti ágóðans geymdur til næsta
árs til að mæta væntanlegri rýrnun, sem verða kynni á vöruleifum”.
Á sama fundi er samþykkt að ráða „hygginn og áreiðanlegan” mann,
sem jafnframt yrði formaður eða framkvæmdastjóri félagsins og hefði
hann aðsetur á Sauðárkróki. „Laun framkvæmdastjóra fari ekki fram
úr 3000 kr., auk húsnæðis, þar að auki hafi hann þetta ár 1% af
útsöluverði aðfluttrar vöru. Aftur á móti greiði hann laun annarra
starfsmanna á Sauðárkróki, nema fram- og uppskipun. Þá ábyrgist
framkvæmdastjóri rýrnun sem ekki er af völdum náttúruhamfara.
Fær hann 1% af seldum vörum til að mæta rýrnun á þeim”. Ekki er
vafi að ráðning Sr. Sigfúsar Jónssonar í kaupfélagsstjórastarfið í
framhaldi af þessari samþykkt 1918, hefur verið happadrjúgt spor, og
stór spurning hver framtíð kaupfélagsins hefði orðið hefði hans ekki
notið við. En að ári liðnu eftir þessar breytingar, sem getið er í
fundargerðinni frá 22. febr. 1918 eða á aðalfundi 28. febrúar 1919,
skilar sr. Sigfús 12.666.88 kr. ágóða af rekstri ársins. Og um leið og
hann heldur traustum tökum um stjórnvölinn, reifar hann hugmyndir
er til framfara horfa. Hann brýnir félagsmenn til dáða um leið og hann
varar við að eyða meiru en aflað er.
Sláturhúsið
Eins og fyrr segir var stofnað sérstakt félag um sláturhúsið, sem reist
var 1908. En árið 1927 er farið að ræða um að kaupfélagið byggi