Gerðir kirkjuþings - 2008, Page 6

6
Kirkjuþing íslensku þjóðkirkjunnar er vettvangur til að skerpa þá sýn, með því að móta
stefnu okkar kirkju og setja ramma utan um starf hennar. Það er gert til að við getum enn
betur sinnt þjónustu fagnaðarerindisins við þjóðina okkar, hughreyst og áminnt, og bent á
hina „varanlegu sjóði og velgengni“ (Orðskv. 8:18), sem felast í því að „stunda réttlæti,
guðrækni, trú, kærleika, stöðuglyndi og hógværð“, eins og postulinn segir (I. Tím. 6:11).
Mættum við axla þá ábyrgð nú og um komandi tíð. Gef oss það, góði Guð, „meðan þín
náð lætur vort láð lýði og byggðum halda.“

Göngum nú með gleði til góðra verka á Kirkjuþingi. Friður Guðs sé með oss öllum.