Gerðir kirkjuþings - 2008, Síða 15

15
orðræðan! Gagnrýnin og málefnaleg umræða er til þess fallin að auka traust á því starfi
sem fram fer á vettvangi Alþingis, sem og Kirkjuþings. En um leið þurfum við að gæta
þess að öll framkvæmd og framvinda mikilsverðra mála drukkni ekki í innantómri
orðræðu.

Orðræða þarf ætíð að vera öguð og stefna að ákveðnu marki til þess að hún geti bæði
verið áhugaverð og trúverðug.

Við Íslendingar upplifum mikla ógnar tíma um þessar mundir, ef ekki þá erfiðustu á
lýðveldistímanum. Við slíkar aðstæður er uppbyggileg og gagnrýnin umræða nauðsynleg.
Alþingi er höfuðvettvangur þjóðmálaumræðunnar, en kirkjan á líka að vera vettvangur
markvissar umræðu þar sem kennimenn setja fram brennandi og krefjandi spurningar
fyrir söfnuði sína.

Um þessar mundir vantar ekki siðferðilegar spurningar að glíma við - þær eru sannarlega
við hvert fótmál.

Kirkjan er vettvangur þar sem boðskap um kristilegt siðferði er komið á framfæri og lagt
í hendur hvers einstaklings að fylgja.

Hið tvöfalda kærleiksboðorð og gullna reglan eru vegvísarnir; leiðarsteinar hins sanna
kristilega lífernis. Kristur felur okkur það verkefni að elska náungann eins og sjálf okkur
og setja okkur í spor hans í öllum okkar gjörðum. Slík samhygð er sannarlega grund-
völlur farsæls lífs.

Góðir þingfulltrúar. Víst er að erfiðleikar í efnahag þjóðarinnar og þá um leið heimilanna
valda spennu og kvíða, sem aftur geta leitt til upplausnar og uppgjafar. Við stjórn-
málamenn stöndum daglega frammi fyrir einstaklingum sem áfellast stjórnvöld fyrir að
hafa sofið á verðinum gagnvart þeim sem hafa misnotað frelsið og með glannaskap ógna
hagsmunum þúsunda einstaklinga og jafnvel hagsmunum og sjálfstæði okkar sem þjóðar.
Það er jafnframt alið á sundrung meðal þjóðarinnar með því að halda því fram að ef við
hefðum verið búin að fórna verulegum hluta fullveldis okkar hefðum við ekki lent í þeirri
stöðu sem við stöndum frammi fyrir núna þegar alþjóðleg fjármálakreppa skellur á okkur
með ógnarafli og alvarlegum afleiðingum.

Úr því sem komið er verður ekki aftur snúið og sagan mun dæma öll mannanna verk. Við
þessar aðstæður allar þarf samstöðu þeirra sem fara með völdin og það er mikilvægt að
varðveita og styrkja fjölskylduna og tengsl milli manna.

Nú þurfa þeir sem leiða þjóðfélagsumræðuna að slíðra sverðin, nú eiga ekki að tíðkast hin
breiðu spjót á meðan þjóðin er í miðjum brimgarðinum.

Við núverandi aðstæður gegnir kirkjan stóru hlutverki. Nú sem aldrei fyrr ríður á að
okkur auðnist að sýna samhygð í orðum og verkum. Megi orð Frelsarans um náungakær-
leika og boðskapur kristilegs siðferðis vera okkur öllum leiðarljós. Megi blessun fylgja
störfum Kirkjuþings!