Gerðir kirkjuþings - 2008, Síða 66

66
Um 9. gr.
Um skipan Kirkjuþings er mælt fyrir í 21. gr. núgildandi laga. Rétt þykir að einfalda þann
lagaramma og láta Kirkjuþingi eftir að kveða á um kjör til þingsins og þingsköp, seturétt
annarra en kjörinna fulltrúa á þinginu og hversu oft þingið skuli koma saman.

Um 10. gr.
Greinin er samhljóða 3. og 4. mgr. 23. gr. núgildandi laga og þarfnast ekki skýringar.

Um 11. gr.
Lagt er til í 1. mgr. að ákvæði um ábyrgð forseta Kirkjuþings á starfsemi þingsins,
undirbúningi þess og eftirfylgd verði skerpt en í núgildandi lögum er ekki að finna önnur
ákvæði um forseta Kirkjuþings en að þingið kjósi sér þingforseta úr röðum leikmanna,
sbr. 5. mgr. 21. gr, og að Kirkjuráð skuli hafa samráð við forseta Kirkjuþings við
undirbúning þingsins og hvernig ráðið fylgi eftir samþykktum þess, sbr. 1. mgr. 27. gr.
Hér er lagt til að forseti Kirkjuþings kalli þingið saman og beri ábyrgð á starfsemi
þess auk þess að stjórna þingfundum. Þá skuli hann undirbúa fundi Kirkjuþings í samráði
við Kirkjuráð og fylgja eftir samþykktum þess með sama hætti. Áhersla er þannig lögð á
frumkvæðisskyldu forseta gagnvart málefnum Kirkjuþings en rétt er og nauðsynlegt að
samráð sé um þetta milli hans og Kirkjuráðs sem fer með framkvæmdavald innan
Þjóðkirkjunnar, sbr. 12. gr., 15. gr. og 23. gr. frv.
Í 2. mgr. er lagt til að forseti Kirkjuþings birti á eindæmi sitt starfsreglur frá
Kirkjuþingi og aðrar réttarskapandi ákvarðanir þess. Í núgildandi lögum er ekki mælt
fyrir um hver skuli annast birtinguna og hefur það verk verið á hendi biskups Íslands. Um
leið og staða forseta Kirkjuþings er skýrð þykir rétt að hann birti ákvarðanir þingsins
fremur en biskup Íslands sem situr á Kirkjuþingi með málfrelsi og tillögurétti en án
atkvæðisréttar.

Um 12. gr.
Ákvæði 1. mgr. er efnislega samhljóða 1. mgr. 26. gr. núgildandi laga.
Ákvæði 2. mgr. er efnislega samhljóða tveimur fyrri málsliðum 2. mgr. 26. gr.
Ekki þykir ástæða til þess hér að hafa sérstakt ákvæði um þá stöðu sem upp kann að
koma verði biskup Íslands vanhæfur í Kirkjuráði vegna fyrri aðkomu hans að máli, enda
tæki varaforseti Kirkjuráðs þá sæti hans við úrlausn þess í ráðinu, sbr. 13. gr. frv.

Um 13. gr.
Lagt er til að Kirkjuþingi verði fengið ákvörðunarvald um skipan Kirkjuráðs og umboð
kirkjuráðsmanna að öðru leyti en því er varðar setu biskups Íslands í ráðinu og forsæti
hans. Kirkjuþing ákveði þannig hlutfall vígðra og leikra í Kirkjuráði og kjör varaforseta
þess. Með þessu móti yrði horfið frá því að lögbinda skipan Kirkjuráðs og umboð þess
um annað en sæti biskups Íslands, sjá 25. gr. núgildandi laga.

Um 14. gr.
Lagt er til í 1. mgr. að ótvírætt skuli vera að Kirkjuráð beri ábyrgð gagnvart Kirkjuþingi
en slíkt ákvæði er ekki í núgildandi lögum. Þetta felur í sér að Kirkjuþing getur vikið
einstökum kirkjuráðsmönnum frá öðrum en biskupi Íslands. Nánari ákvæði um fram-
kvæmd þessa setur Kirkjuþing í starfsreglur, sbr. 17. gr. frv.