Skessuhorn - 20.12.2022, Qupperneq 95

ÞRIÐJUDAGUR 20. DESEMBER 2022 95
Iddi Biddi og Eygló Egils
Jólaþáttur Skinkuhorns er kom­
inn í loftið. Mæðginin Ingi Björn
Róbertsson, einnig þekktur sem
Iddi Biddi, og Eygló Egilsdóttir
mættu í jólaheimsókn í Skinku­
hornið, hlaðvarp Skessuhorns. Þau
ræddu ýmsar jólahefðir og jólagrín
en þau eru bæði miklir stríðnis­
púkar og dettur ýmislegt í hug.
Fjölskylda þeirra er þess vegna
hvergi hult fyrir stríðni þeirra,
hvort sem er um jól eða sumar.
Einn pakki á mann
Eygló Egilsdóttir ólst upp í þrettán
systkina hópi, hún sagði frá æsku­
jólum sínum í þættinum. „Ég er
að alast upp sem barn á jólunum
uppúr 1950. Mér fannst jólin
alveg yndislegur tími, það var allt
svo hátíðlegt í kringum þetta. Það
var náttúrulega ekkert sjónvarp
og lítið um að vera en gleði jól­
anna var ofboðslega spennandi.
Til dæmis að sjá jólakjólana hanga
á aðfangadag. Svo máttum við ekki
fara inn í stofu, hún var bara opnuð
klukkan sex og þetta var eins og að
koma inn í himnaríki þegar jóla­
tréð stóð í stofunni. Svo var bara
einn pakki á mann og enginn fór
í fýlu, það var ekki búið að finna
hana upp,“ segir Eygló.
Gaf sama
jólasveininn oft
Eygló stofnaði fjölskyldu 19 ára og
var þrítug orðin einstæð með fimm
börn. Ingi Björn spyr mömmu
sína hvernig það gangi fyrir sig
að halda jól, ein með fimm börn.
„Það gekk bara vel og ég man ekki
eftir neinum leiðindum. Ég keypti
einhvern tímann prjónaðan jóla­
svein og gaf alltaf yngsta barninu
jólasveininn í jólagjöf. Hvað ætli sé
búið að gefa hann oft,“ spyr Eygló
Inga Björn. „Það hafa allir fengið
þennan jólasvein í jólagjöf á ein­
hverjum tímapunkti. Svo þegar
við urðum fullorðin fórum við að
fá hann aftur,“ segir Ingi Björn.
„Já, hann er orðin 43 ára gamall,“
segir Eygló sem hafði jólasveininn
umrædda með í för þegar viðtalið
var gefið í hljóðvarpi Skessuhorns.
Mamma mesta
skaðræðið
Eygló segir mikla stríðni hafa
verið á heimilinu þegar hún var að
alast upp. „Ég segi oft að ég væri
prófessor við háskóla ef ég hefði
fengið frið til að læra og bræður
mínir hefðu ekki strítt mér svona
mikið. En ég var svo reyndar ekk­
ert skárri og stríddi mikið sjálf.“
Ingi Björn bætir svo við orð móður
sinnar: „Mamma er rót hins illa í
stríðni. Fólk heldur nefnilega að
ég sé verstur í fjölskyldunni af
því að ég tek stundum að mér að
skemmta og er nógu vitlaus til að
sýna frá einhverri vitleysu á sam­
félagsmiðlum. En ég er svo langt
frá því að vera mesta skaðræðið.
Mamma er sennilega stríðnust af
öllum í fjölskyldunni, hún finnur
svona ákveðna punkta. Hún t.d.
stríðir elstu dóttur sinni mikið með
því að gera eitthvað vandræða legt
á opinberum stöðum því hún veit
að henni finnst það vandræðalegt,“
segir Ingi Björn.
Stríðin jól
Tuttugu ár eru á milli Inga Björns
og elstu systur hans svo þau systk­
inin eru fædd á breiðu tímabili.
Þegar eldri systkinin voru að koma
heim fyrir jólin myndaðist oft galsi
á heimilinu. „Það komu alltaf allir
heim um jólin og allir voru saman.
Við fórum að keppast um að stríða
hvert öðru með gjöfum og það
hefur viðgengist síðan. Sigga, elsta
systir okkar, vildi fá minimalisk jól
árið 2020, hún á engin börn og
nennti þessu jólastússi ekkert. Hún
bað þess vegna um að fá engar
jólagjafir. Við ákváðum þá að gefa
henni hvert um sig 5­10 pakka.
Þetta voru t.d. grænar baunir,
tannkrem og pulsupakki. Þannig
að hún þurfti að opna þetta allt
og við merktum þetta frá Guðna
Th og allskonar fólki. Hún end­
aði með tvo svarta ruslapoka af
allskyns nytsamlegum hlutum eftir
þessi jól og grínið var að hún gat
ekki hent neinu, þetta var allt eitt­
hvað sem hún gat notað,“ segir
Ingi Björn.
Stríða ekki hvort öðru
Ingi Björn og Eygló segjast ekki
stríða hvort öðru þar sem þau eru
of lík. „Mamma veit að ef hún
stríðir mér þá fær hún það bara allt
til baka. Svo getum við ekki farið
saman t.d. í búð, við horfum á fólk
með öðrum augum en flestir og
upplifum lífið okkar oft í sketsum.
Það er kannski gömul kona að
labba og ég segi við mömmu; „á
ég að lyfta henni upp,“ svo kannski
labba ég að konunni, en ég er ekk­
ert að fara að lyfta henni upp,“
segir Ingi Björn kíminn. Eygló
bætir við: „Ég horfi stundum bara
á hann í einhverjum aðstæðum
og sé að við erum að hugsa það
sama, þá fer ég bara í hláturs kast.
Ég er líka svo fljót að búa til eitt­
hvað áframhald af einhverjum
aðstæðum í hausnum á mér og fer
mjög auðveldlega í hláturskast,“
segir Eygló hlæjandi.
Sagan um
Eggert bróður
Lygasaga vatt upp á sig í fjöl­
skyldunni þegar elsta systirin laug
að þeirri yngstu að systkinin ættu
bróður á Ísafirði sem Eygló hafði
skilið þar eftir. Þau hafa í mörg ár
fengið jólakort og gjafir frá Egg­
ert. „Marta systir var mjög skýr
krakki og hlustaði á aðra tala á
meðan ég var að leika mér í Lego
eða eitthvað. Elsta systir okkar fór
einhvern tímann í aðgerð þar sem
verið var að fjarlægja eitthvað sem
heitir tvíburabróðir, það er ein­
hver varta eða fæðingarblettur
eða eitthvað. Þegar Marta spurði
hvaða tvíburabróður væri verið að
tala um, byrjaði Sigga að ljúga að
Mörtu um að Sigga ætti tvíbura­
bróður sem hét Eggert Eyglóar­
son. Svo byrjar bara einhver lygi
í kringum þetta og Marta gleypir
við þessu öllu saman. Við ætluðum
svo að gefa mömmu mynd af
okkur systkinahópnum í jólagjöf
einhvern tímann og það er verið
að taka svona tjékk hvort það séu
ekki allir komnir. Þá kallar Marta;
„nei það vantar Eggert bróðir.“
Þarna blæs þetta grín upp og Egg­
ert Eyglóarson er meira að segja á
Facebook í dag. Það koma reglu­
lega frá honum pakkar um jólin
og jólakort. Þegar systurnar fóru
að eignast menn, sem gerðist
mjög seint, voru þeir sérstaklega
kynntir fyrir Eggerti. Það er ein­
hver manneskja sem er greinilega
meira í málsvari fyrir hann en aðrir
og mig grunar að það sé Sigga,“
segir Ingi Björn.
Hlusta má á þáttinn í heild sinni
á Spotify, Soundcloud og vefsíðu
Skessuhorns. Ekki missa af þessum
léttlyndu mæðginum.
sþ
Félag íslenskra hjúkrunarfræðinga óskar eftir að leigja vönduð
sumarhús eða orlofsíbúðir fyrir félagsmenn sína.
Leitað er eftir húsnæði víðs vegar um landið. Eignirnar þurfa að vera
snyrtilegar, fullbúnar húsgögnum og öðrum viðeigandi búnaði.
Áhugasamir sendi upplýsingar á hjukrun@hjukrun.is
eða hafi samband við skrifstofu í síma 540 6400.
Átt þú orlofseign sem þú vilt leigja?
Skinkuhorn