Milli mála - 2023, Page 100

MILLI MÁLA
100 Milli mála 15/2/2023
Búferlaflutningum yfir Atlantshafið er gjarnan lýst sem ferli þar
sem einstaklingur tekur ákvörðun um að yfirgefa endanlega „heima-
landið“ og leita á náðir ákveðins „móttökulands“ – ekki síst vegna
þess að landið er sú stjórnsýslueining sem er fyrirferðarmest í lífi
þverþjóðlegrar fjölskyldu. Stjórnsýsluleg landamæri hafa hins vegar
takmarkað vægi í lífi og ljóðum Fríðu sem er bundnust af félagslegri
stöðu sinni á hverjum tíma.
Sujatha Fernandes hefur bent á að ekki sé síður þörf fyrir flóknar
frásagnir af reynslu manneskjunnar utan hringiðu heimsins en þeim
miðlægu veitum sem bjóða upp á vandlega matreiddar sögur sem
ögra ekki ríkjandi kerfi samfélagsins eða setja spurningarmerki við
valdaójafnvægi og viðteknar skoðanir.53 Auðvelt er að setja fram
sögur um einstaklinga sem vilja hefja „leit að betra lífi“ í öðru landi,
en þá er hætt við að horft sé fram hjá öðrum mikilvægum þáttum
sem tengjast ekki efnahagsástandi, t.d. löngun til að sameinast
öðrum í fjölskyldunni í kjölfar áfalls. Togstreitan fyrir Fríðu eftir
föðurmissinn snýst kannski ekki svo mikið um valið milli Íslands og
annars lands heldur um það hvort hún sem sjálfmenntuð skáldkona
í heimi þar sem mjög hallar á hlut kvenna geti fundið sér samastað
við litla lækinn sinn eða hvort hún þurfi að fara þaðan út í hina stóru
veröld.
53 Fernandes, Curated Stories: The Uses and Misuses of Storytelling.
SVAR VIÐ BRÉFI FRÍÐU
10.33112/millimala.15.2.4