Milli mála - 2023, Page 221
Milli mála 15/2/2023 221
vantraust ríkir meðal íbúa og fjölskyldubönd hafa gliðnað. Samskipti
kynjanna eru oftar en ekki byggð á fölskum forsendum, brostnum
vonum og vansæld, og hver og einn olnbogast áfram í einstæðings-
skap. Mistök, vonbrigði og jafnvel afhroð eiga við um sögulok
margra verka Civale en þrátt fyrir það er tónninn hvorki vonleysis-
legur né mótaður af uppgjöf. Því er glettinn hæðnistónn og um-
burðarlyndi gagnvart breyskleika sögupersónanna ráðandi í verkum
hennar.
Í verkum sínum vinnur Civale síendurtekið með mörk, viðmið og
andstæður. Framsetning hennar á flæðandi landamærum snilli og
brjálsemi, heilbrigðis og fíknar, minnis og gleymsku leiða lesandann
að ákallandi spurningum um mörk lífs og dauða, ástar og haturs,
góðs og ills og þess sem er viðtekið og bannað. Um eigin skrif segir
Civale:
Skriftir móta allt sem ég geri og orðin hríslast um mig. Ég skapa, legg til,
virkja hugmyndir og held sífellt áfram. Eftir mig liggja annálar, erótískar
sögur, frásagnir af skipbrotum og spennandi skáldsögur sem daðra jafnt
við melódrama og ádeilu. Það að skrifa gerir mér kleift að leika mér, láta
mig hverfa, ljúga, uppgötva, kanna, veita andspyrnu og horfa út fyrir eigið
sjálf en kafa jafnframt í það. Ég skrifa af því að aðrar gerðu það á undan
mér.3
Sögurnar sem hér birtast eru úr smásagnasafninu Fylliríssögur (Cuentos
alcohólicos, 2009) og afhjúpa hversdagslegar aðstæður þar sem vonir
standa til þess að áfengi töfri fram tilveru sem vert er að lifa í og laði
fram sögur sem verðskulda það að vera sagðar.
3 Fengið af https://www.amazon.com/-/es/Cristina-Civale/dp/9508520965. Þýðing mín.
HÓLMFRÍÐUR GARÐARSDÓTTIR