Morgunblaðið - 09.10.2014, Blaðsíða 42

42 FRÉTTIRInnlent
MORGUNBLAÐIÐ FIMMTUDAGUR 9. OKTÓBER 2014
FERÐAÞJÓNUSTA
Skapti Hallgrímsson
skapti@mbl.is
Gistihúsið á gamla stórbýlinu, Egils-
stöðum á Héraði, hefur tekið stakka-
skiptum á síðustu misserum. Ný,
stór gistiálma var tekin í notkun í
sumar og móttaka sem tengir gömlu
bygginguna við þá nýju. Rými er nú
fyrir nærri þrefalt fleiri næturgesti
en áður.
Þrátt fyrir að enn sé haldið í gisti-
húsaheitið á hlédrægan hátt er
þarna um að ræða fallegt hótel.
Egilsstaðabúið hefur lengi verið
eitt helsta tákn samfélagsins eystra;
stóra, virðulega hvíta húsið með
rauða þakinu. Þar byggðu Jón
Bergsson og Margrét Pétursdóttir
býli árið 1903 og afkomendur þeirra
hafa alla tíð átt staðinn.
Stórt kúabú hefur verið á jörðinni
áratugum saman og ferðaþjónusta
einnig, en óhætt er að segja að risa-
skref hafi verið stigið á því sviði með
breytingunum nú.
Hjónin Gunnlaugur Jónasson og
Hulda Elísabeth Daníelsdóttir eiga
og reka hótelið. Keyptu húsið af
frænku Gunnlaugs fyrir hálfum öðr-
um áratug en þá hafði gistihúsið ver-
ið lokað í nokkur ár og húsið þarfn-
aðist mikils viðhalds.
„Við bjuggum úti í Danmörku;
konan mín hafði verið þar í 18 ár og
ég með henni í fimm, og vorum að
spá í að koma heim. Vissum af hús-
inu hér tómu, langaði að fara út í
ferðaþjónustu og létum verða af
því,“ segir Gunnlaugur. „Mörgum
þótti þetta algjört rugl í okkur, enda
fengum við bjartsýnisverðlaun
Framfarafélags Fljótsdalshéraðs!“
Gunnlaugur segir suma hafa hald-
ið því fram að húsið væri ónýtt. „Það
var ekki borin mikil virðing fyrir
gömlum húsum hér á þessum tíma;
margir voru á því að svona gamlar
byggingar væru bara drasl, en kom-
ið hefur í ljós að húsið var mjög vel
farið þótt töluvert þyrfti að laga.“
Hjónin voru mjög skynsöm fyrstu
15 árin, segir Gunnlaugur; þar til nú!
„Við gerðum húsið upp smám saman
að vetrarlagi fyrir innkomu sumars-
ins. Við vorum búin að hugsa um að
byggja við í ein tíu ár og fórum
kannski yfir skynsemismörkin núna;
það á eftir að koma í ljós,“ segir
hann en kveðst, þrátt fyrir að taka
svona til orða, vera bjartsýnn.
Byrjað var að byggja í nóvember í
fyrra og nýja húsið var tekið í notk-
un um miðjan júní. „Við bættum við
32 herbergjum og erum því með 50 í
dag.“ Þarna er líka ný móttaka sem
fyrr segir, lyftur settar í húsið og
verið er að byggja baðhús undir
móttökunni.
„Það er troðfullt hjá okkur yfir
sumarið, í júní, júlí og ágúst, maí og
september eru ágætir en ferða-
mennskan dettur mikið niður yfir
veturinn. Reksturinn þá er ansi
þungur enda erum við ansi langt frá
aðalinnkomuleiðinni í landið.“
Lengi hafa verið uppi hugmyndir
um að koma á beinu flugi til Egils-
staða erlendis frá og Gunnlaugur á
bágt með að skilja að af því hafi aldr-
ei orðið. Það taki alls 50 mínútum
skemmri tíma að fljúga fram og til
baka til Egilsstaða en Keflavíkur frá
ýmsum stöðum á meginlandi Evrópu
og Norðurlöndunum og það hljóti að
skipta máli. „Það breytir hins vegar
engu fyrir þann mikla fjölda fólks
sem kemur til að ferðast hringinn í
kringum landið hvar hann lendir.
Það hlýtur að vera gáfulegra þegar
allt er fullt á suðvesturhorninu að
opna aðra gátt inn í landið. Við erum
með góðan flugvöll hér en það er
pólitísk ákvörðun að breyta þessu.“
Mikil uppbygging við Lagarfljót
 Stór viðbygging tekin í notkun við Gistihúsið á Egilsstöðum  Fluttu frá Danmörku og endur-
vöktu ferðaþjónustu 1998  „Mörgum þótti þetta algjört rugl enda fengum við bjartsýnisverðlaun“
Gamalt Egilsstaðabúið gamla. Gunnlaugur og Hulda Elísabeth endurbættu húsið smám saman á löngum tíma.
Morgunblaðið/Skapti Hallgrímsson
Nýtt Álma með 38 herbergjum og glæsilegri mótttöku sem byggð var í fyrravetur og tekin í notkun í júní.
Breytingar Gunnlaugur Jónasson á
Egilsstöðum kveðst bjartsýnn.
Mjög hefur verið í tísku í nokkur ár
á veitingastöðum víða um heim að
bjóða upp á mat úr héraði. Á það er
til dæmis lögð áhersla á Gistihúsinu
á Egilsstöðum.
Ósennilegt er að víða sé nálægðin
þó jafn mikil og á þessu tiltekna
hóteli. Þar er sannarlega boðið upp
á mat af Héraði …. Frændur Gunn-
laugs reka nefnilega nautgripabú
við hlið gistihússins, þar sem það
hefur verið í áratugi.
Í fjósi eru nú nokkur hundruð
naut og 80 mjólkurkýr og nautakjöt
frá bænum auðvitað á matseðli
gistihússins.
Þetta vekur athygli gesta, ekki
síst erlendra, sem eru tíðir. Og þótt
hótelið sé aðeins steinsnar frá þétt-
býlinu á Egilsstöðum, eina 300
metra, er það samt úti í náttúrunni.
Til dæmis var mjög vinalegt fyrir
gamlan kúarektor að anda að sér
ilmandi sveitaloftinu.
Morgunblaðið/Skapti
Hvað vilt þú? Nautgripir eru forvitnir á Egilsstöðum sem annars staðar.
Nautakjöt úr næsta
húsi á matseðlinum