Læknablaðið - 15.04.2007, Qupperneq 79

UMRÆÐA & FRÉTTIR / AF SJÓNARHÓLI STJÓRNAR LÍ
Læknar, velkomnir á 21. öldina
- virkjum heimasíðuna!
Heimasíðu Læknafélags íslands var hleypt af
stokkunum árið 2003 ásamt undirsíðum fyrir hin
ýmsu fagfélög. Mikil vinna hefur verið lögð í að
gera síðuna sem glæsilegasta og undanfarið hafa
þónokkrar breytingar verið gerðar sem gera hana
notendavænni og er hún nú að mínu mati komin
í ágætt horf. Hins vegar hefur umferð um síðuna
ekki verið mikil og ljóst að nú þegar umgjörðin
er klár, þarf að leggja meiri vinnu í raunverulegt
innihald síðunnar.
En hver er tilgangurinn með slíkri síðu, hvað á
hún að innihalda og hverjum á hún að gagnast?
Heimasíðan er klárlega góður vettvangur fyrir
Læknafélag Islands til að miðla upplýsingum til
sinna félagsmanna. Kjarasamningar, lög félagsins,
Codex Ethicus ásamt upplýsingum um stjórn og
nefndir er nú þegar að finna á síðunni auk ýmissa
annarra gagnlegra upplýsinga. Auk þess hefur
framkvæmdastjóri félagsins skrifað skemmtilega
og fræðandi pistla um málefni líðandi stundar sem
eru orðnir ómissandi á hverjum föstudegi. Nýlega
var orlofssíðan opnuð en hún gerir læknum kleift
að sækja um orlofsbústaði á rafrænan hátt en auk
þess eru sendar út tilkynningar sem auðvelda
félagsmönnum að fylgjast með því hvaða bústaðir
eru lausir hverju sinni.
Fagfélögin hafa verið misvirk í því að nýta sér
sín heimasvæði. Þar má til dæmis taka sér Félag ís-
lenskra heimilislækna til fyrirmyndar en þeir hafa
haldið úti öflugri heimasíðu um árabil. Fagfélögin
geta nýtt síðu sína til margra hluta, svo sem til að
minna félagsmenn á komandi ráðstefnur, nám-
skeið og fundi, halda úti upplýsingum um félögin
og setja inn tengla um áhugaverð efni. Einnig er
heimasíðan góður vettvangur fyrir hvers kyns
umræður þar sem félagsmenn starfa oft á mörgum
vinnustöðum. Á heimasíðu Félags ungra lækna
hafa menn verið duglegir við að miðla upplýs-
ingum um laus störf auk þess sem settar hafa verið
inn upplýsingar um sérnám í útlöndum. Þar hafa
læknar getað komið með fyrirspurnir til þeirra sem
staddir eru úti í námi.
Þannig er tilgangur heimasíðunnar tvíþættur.
Hann lýtur annars vegar að starfsemi okkar stétt-
arfélags þar sem upplýsingamiðlun til félagsmanna
er lykilþáttur. Hins vegar lýtur tilgangurinn að því
að efla faglegt starf þar sem heimasvæði fagfélag-
anna eru í fararbroddi og skiptir þátttaka hvers
félagsmanns í umræðum og fleiru miklu máli.
En hver á að stýra því hvað fer inn á síðuna?
Ritstjórar hafa verið settir yfir hvert undirsvæði
en ljóst er að síðan byggist ekki síður á virkni hins
almenna félagsmanns. Allir félagsmenn geta stofn-
að til umræðna og komið með hugmyndir að efni
sem hægt væri að setja inn. Heimasíðan getur því
ekki virkað vel nema með þátttöku sem flestra en
ritstjórarnir hljóta alltaf að bera ábyrgð á því efni
sem fer inn á þeirra heimasvæði.
Ljóst er að leggja þarf meiri vinnu í uppbygg-
ingu heimasíðunnar og móta þarf stefnu um það
hvernig hún þjóni best tilgangi sínum. Því hefur
verið skipaður starfshópur um málefni heimasíð-
unnar en jafnframt er það von mín að félagsmenn
láti meira til sín taka í uppbyggingu, nýtingu og
þróun hennar.
Sigurdís
Haraldsdóttir
UNGLÆKNIR
sihl 7@hi.is
í pistlunun Af sjónarhóli
stjórnar birta stjórnarmenn LÍ
sínar eigin skoðanir en ekki
félagsins.
Læknablaðið 2007/93 343