Frjáls verslun - 01.09.2006, Blaðsíða 66
66 F R J Á L S V E R S L U N • 9 . T B L . 2 0 0 6
A lþjóðasvið Viðskiptaráðs Íslands var stofnað fyrir þremur árum til að halda utan um millilandaráð viðskiptaráðsins; Sænsk-
íslenska viðskiptaráðið, Þýsk-íslenska viðskiptaráðið og fleiri. Kristín
S. Hjálmtýsdóttir, sem var framkvæmdastjóri Þýsk-íslenska við-
skiptaráðsins í 10 ár, er nýráðinn framkvæmdastjóri alþjóðasviðsins
og hún segir að ráðin hafi verið orðin allmörg og að starfsemin hafi
skarast á vissum sviðum.
Markmið millilandaráðanna er að hafa milligöngu um viðskipti
milli Íslands og annarra landa, miðla upplýsingum og aðstoða fyr-
irtæki og einstaklinga sem hafa áhuga á að komast í viðskipti í öðrum
löndum. Að mati Kristínar má halda því fram að markmið þessarar
starfsemi sé í reynd að búa til alþjóðlegt tengslanet, viðhalda því og
stækka það svo að félagar ráðanna geti nýtt sér þau sambönd sem
skapast jafnt við fyrirtæki, félagasamtök og stofnanir.
Kristín bendir á að þau millilandaráð sem heyra undir alþjóða-
sviðið séu misstór og starfsemi þeirra því mismikil. „Þýsk-íslenska við-
skiptaráðið er til dæmis mjög umsvifamikið og með mikla starfsemi
og þar er daglegur rekstur töluverður á meðan önnur eru minni og
starfsemin tengist fyrst og fremst sérstökum viðburðum sem þau
standa fyrir. Daglegur rekstur tengist auðvitað skipulagningu við-
burða, upplýsingagjöf, samskiptum við erlend og íslensk fyrirtæki og
síðan að sjálfsögðu hefðbundinni umsýslu.“
Kristín segir að alþjóðasviðið sé fyrst og fremst þjónustusvið.
„Hlutverk þess er kannski ekki beint að skapa viðskiptatækifæri
heldur aðstoðar það við að koma á tengslum og samböndum. Það
stendur hins vegar oft fyrir fundum, ferðum og ráðstefnum þar sem
reynt er að leiða saman fólk sem gæti haft áhuga á að mynda við-
skiptasamband. Að því leyti getur ráðið haft mikið frumkvæði en
auðvitað veltur framhaldið síðan á fyrirtækjunum sjálfum sem end-
anlega taka ákvörðun um hvort af viðskiptum verður.“
Helstu viðskiptalönd Íslendinga
Ráðin verða oftast til fyrir milligöngu Viðskiptaráðs Íslands og
þeirra fyrirtækja sem eru í viðskiptum við viðkomandi land. Milli-
landaráðin tengjast jafnan helstu viðskiptalöndum Íslendinga.
„Ástæðan er í sjálfu sér einföld - þau lönd sem Íslendingar eiga mest
viðskipti við eru líka þau sem fýsilegast er að eiga annars konar
samstarf við.“
Mikill áhugi er á að fjölga millilandaráðunum en Kristín segir að
engin ákvörðun hafi verið tekin um hvort af því verður. ,,Það kostar
mikla fyrirhöfn að koma á millilandaráði, mikla vinnu og áhuga og
það verður að vera tryggt áður en lagt er af stað að starfið muni skila
árangri.“
Að sögn Kristínar verður þess gætt að hvert ráð haldi ákveðnu
sjálfstæði líkt og verið hefur. „Viðburðir eru til dæmis ekki
skipulagðir í nafni Alþjóðasviðsins. Þýsk-íslenska viðskiptaráðið
skipuleggur til að mynda árlega Íslandskynningu í Þýskalandi en
Bresk-íslenska viðskiptaráðið skipuleggur það sem að Bretlandi
snýr og svo framvegis. Þá hafa öll ráðin sjálfstæðan fjárhag, eigin
félagaskrá og eigin stjórn.“
Stjórnarseta í millilandaráðunum byggist á áhuga þeirra sem þar
sitja. „Það hefur verið gæfa ráðanna að í þessar stjórnir hefur undan-
tekningalaust valist áhuga- og atorkusamt fólk. Framkvæmdastjóri
starfar eðlilega náið með stjórninni og kannski sérstaklega stjórnar-
formanninum og að auki nýtur hann samstarfsins við Viðskiptaráð
Íslands og starfsmenn þess. Þessi umgjörð tryggir að starfið skilar þeim
árangri sem stefnt er að. Síðast en ekki síst ber að nefna ómetanlegan
þátt erlendra sendiráða á Íslandi og íslenskra sendiráða erlendis. Við
þau öll er mikið og gott samstarf sem og svo auðvitað við félagana,
bæði hér heima og í öðrum löndum. Á endanum eru það auðvitað
þeir og sú þjónusta sem þeir fá sem skiptir öllu máli.“
Kristín S. Hjálmtýsdóttir: „Þau lönd sem Íslendingar eiga mest viðskipti við eru jafnframt þau
sem fýsilegast er að eiga annars konar samstarf við.“
ALÞJÓÐASVIÐ VIÐSKIPTARÁÐS ÍSLANDS
Alþjóðlegt
tengslanet
markmiðið
„Alþjóðasvið Við-
skiptaráðs Íslands var
stofnað fyrir þremur
árum til að halda utan
um millilandaráð við-
skiptaráðsins.“