Frjáls verslun - 01.09.2006, Blaðsíða 68

68 F R J Á L S V E R S L U N • 9 . T B L . 2 0 0 6
Páll Kr. Pálsson, framkvæmdastjóri og eigandi ráðgjafafyrirtæk-isins Skyggnis og fjárfestingafélagsins Tvídranga, er formaður
Þýsk-íslenska viðskiptaráðsins. Þegar Páll er spurður hvers vegna hann
hafi sóst eftir formannsstólnum segir hann að sér hafi þótt verkefnið
spennandi og að hann vilji leggja sitt af mörkum til að efla tengsl
þjóðanna á sviði viðskipta og verslunar.
Páll var kosinn formaður þegar ráðið var stofnað haustið 1995 í
Hamborg og Reykjavík. „Stofnfélagar voru um eitt hundrað og stjórn
ráðsins hefur verið í þýskum anda; lítið um mannabreytingar. Við
höfum verið heppin með öflugt fólk sem komið hefur að starfi og
uppbyggingu ráðsins í gegnum árin.“
Á meðal verkefna Þýsk-íslenska viðskiptaráðsins er að hafa
milligöngu um viðskiptasambönd, veita upplýsingar um heimilisföng
og nákvæmar upplýsingar um einstök fyrirtæki, það sér um kynn-
ingu á einstökum fyrirtækjum samkvæmt beiðni, um kynningu á
framleiðslu og þjónustu fyrirtækja og um markaðsrannsóknir. Þá
veitir það aðstoð í deilumálum, meðal annars við öflun lögfræðinga í
Þýskalandi, og sér um bréfaskriftir fyrir hönd fyrirtækja, þýðingar og
túlkun, meðal annars í tengslum við fyrirtækjaheimsóknir. Það veitir
aðstoð við bréfaskriftir í skatta- og tollamálum, aðstoðar m.a. við að
fá endurgreiddan virðisaukaskatt í Þýskalandi vegna viðskiptaferða
og ferða á sýningar og veitir upplýsingar um tolla af inn- og útflutn-
ingsvörum.
„Þýskir dagar“
„Við höfum staðið fyrir „þýskum dögum“ í Reykjavík fjórum sinnum
– meðal annars í bakaríum í samvinnu við Landssamband íslenskra
bakarameistara. Við höfum fengið fyrirlesara til landsins og síðast en
ekki síst höfum við staðið fyrir „Íslandskynningum“ í Þýskalandi. Þær
kynningar höldum við einu sinni á ári í tengslum við aðalfund ráðs-
ins. Við tökum venjulega fyrir eitt þema, svo sem fjármálamarkaðinn,
sjávarútveg, ferðaþjónustu og orku. Yfirleitt er með í för frá Íslandi
ráðherra viðkomandi málaflokks.“
Þýsk-íslenska viðskiptaráðið vinnur náið með íslenska sendi-
ráðinu í Berlín. Þá er ráðið hluti af neti þýskra viðskiptaráða sem eru
tæplega tvö hundruð bæði innan og utan Þýskalands. „Þar erum við
fullgildir meðlimir og höfum aðgang að öllum fyrirtækjum í Þýska-
landi þar sem öll fyrirtæki landsins eru félagar í viðskiptaráði sinnar
borgar. Þetta net hefur oftar en ekki nýst félagsmönnum okkar þegar
fá þarf nákvæmar upplýsingar um starfsemi þýskra fyrirtækja.“
Hvað varðar innflutning frá Þýskalandi bendir Páll á að mikið sé
flutt inn frá Þýskalandi, en meira en helmingur þess séu vélar af ýmsu
tagi og bílar. Árið 2005 nam innflutningurinn um 435 milljónum
evra.
„Okkur hjá Þýsk-íslenska finnst vanta meira af þýskum neyt-
endavörum svo sem matvöru og eitthvað af því góða víni sem fram-
leitt er í Þýskalandi.“ Páll bendir þó á að lífrænt ræktuð matvara verði
sífellt vinsælli og rúmlega helmingur alls þess innflutnings séu þýsk
vörumerki.
Hvað varðar útflutning til Þýskalands nefnir Páll sjávarafurðir,
ál og hross og á síðustu árum hefur útflutningur á íslenskri tækni
aukist. „Nægir að nefna fyrirtæki eins og Actavis, Marel og Össur.
Samtals var útflutningur til Þýskalands 345 milljónir evra árið 2005
og Þýskaland hefur verið eitt helsta viðskiptaland okkar um margra
ára skeið.“
ÞÝSK-ÍSLENSKA VIÐSKIPTARÁÐIÐ
Páll Kr. Pálsson: „Okkur hjá Þýsk-íslenska finnst vanta meira af
þýskum neytendavörum svo sem matvöru og eitthvað af því góða
víni sem framleitt er í Þýskalandi.“
Útflutningur 345
milljónir evra
„Þýskaland hefur
verið eitt stærsta við-
skiptaland okkar um
margra ára skeið.“