Frjáls verslun - 01.09.2006, Blaðsíða 73

Úlfar Steindórsson, forstjóri Toyota á Íslandi, er formaður Spænsk-íslenska viðskiptaráðsins. Hann var framkvæmdastjóri SÍF á
Spáni árið 1997 þegar ráðið var stofnað. „Á þeim tíma var reynt að
setja saman stjórn sem samanstóð annars vegar af Íslendingum, sem
störfuðu á Spáni, og Spánverjum og hins vegar af aðilum á Íslandi
sem voru í viðskiptum við Spánverja. Ég sat í ráðinu til ársins 2000
en þá var ég fluttur til Íslands og tekinn við starfi framkvæmdastjóra
Nýsköpunarsjóðs. Ég fór síðan aftur í stjórn ráðsins árið 2003. Þá var
ég starfandi stjórnarformaður í Primex ehf. sem var í viðskiptum við
Spán.“
Úlfar varð formaður Spænsk-íslenska viðskiptaráðsins árið 2003.
„Starf í ráðinu tekur ekki mikinn tíma en þetta gefur manni tækifæri
til að hitta fólk endrum og sinnum og ræða samskipti Íslands og
Spánar.“
Úlfar segist hafa mikinn áhuga á að viðskipti milli landanna geti
vaxið og dafnað. „Ég myndi vilja að spænskt sendiráð væri á Íslandi
en í dag þurfum við að sækja það sem á þarf að halda í samskiptum
við Spán í gegnum sendiráð Spánar í Osló. Þá hef ég mikinn áhuga
á að fleiri Íslendingar kynnist Spáni á annan hátt en flestir gera í
sólarlandaferðum. Spánn hefur upp á að bjóða svo margbreytilega
menningu og marga frábæra staði sem íslenskir ferðamenn fara á mis
við. Ég er sjálfur ekki búinn að heimsækja alla þá staði sem ég hef
áhuga á að heimsækja þrátt fyrir að hafa farið oft til Spánar síðan ég
bjó þar á sínum tíma.“
Vín, húsgögn, ávextir...
Spænsk-íslenska viðskiptaráðið stendur fyrir fundum og ráðstefnum
um málefni sem tengjast viðskiptum á milli landanna. Það skipuleggur
heimsóknir aðila úr viðskiptalífi annars ríkisins til
hins. „Ráðið vakir yfir viðskiptalegum hagsmunum
félaga sinna jafnt hjá spænskum sem íslenskum yfir-
völdum og opinberum stofnunum. Það veitir beina
þjónustu samkvæmt ákvörðun stjórnar hverju sinni
svo sem varðandi upplýsingar um viðskiptasam-
bönd, það aðstoðar við að koma á tengslum milli
fyrirtækja og safnar og miðlar upplýsingum um viðskiptalíf landanna.
Starfsmenn Viðskiptaráðsins sinna stórum hluta af þessari þjónustu
ráðsins.“
Úlfar segir að samskipti Spænsk-íslenska viðskiptaráðsins séu
aðallega við „Las Camaras Comercios“. „Í flestum spænskum borgum
eru viðskiptaráð sem eru hluti af ,,Las Camaras Comercios“ og þegar
Spænsk-íslenska viðskiptaráðið hefur verið með aðalfundi sína, á
þriggja ára fresti, hafa þeir verið haldnir í samstarfi annars vegar
við viðskiptaráðið í Bilbao þar sem aðalfundurinn var árið 2000
og við viðskiptaráðið í Vigo þar sem fundurinn var árið 2003. Við-
skiptaráðið í Barcelona tók þátt í undirbúningi að
stofnfundi ráðsins árið 1997.“
Úlfar nefndir spænskt vín þegar hann er spurður
um innflutning frá Spáni. „Spánverjar voru þeir einu
sem fengu að flytja inn vín til Íslands á þeim árum
þegar bannað var að flytja inn áfengi. Ástæðan var
að þeir neituðu annars að kaupa af okkur saltfisk.“
Úlfar nefnir líka spænsk húsgögn og fatnað. „Ávextir og grænmeti eru
líka hluti af innflutningnum en það ber kannski minna á alls konar
efnavörum sem eru þó stór hluti af innflutningnum.“
Fiskur er helsta útflutningsvaran til Spánar eða tæp 90% af öllum
útflutningi þangað. „Þar vegur þyngst útflutningur á saltfiski sem
Spánverjar hafa keypt frá því Íslendingar fóru að verka saltfisk. Mestur
vöxtur í útflutningi síðustu árin er þó á lyfjum.“
SPÆNSK-ÍSLENSKA VIÐSKIPTARÁÐIÐ
Úlfar Steindórsson. „Spánverjar voru þeir einu sem fengu að flytja
inn vín til Íslands á þeim árum þegar bannað var að flytja inn áfengi.
Ástæðan var að þeir neituðu annars að kaupa af okkur saltfisk.“
Fiskútflutningur um 90%
af viðskiptunum við Spán
F R J Á L S V E R S L U N • 9 . T B L . 2 0 0 6 73
„Mestur vöxtur í
útflutningi síðustu
árin er á lyfjum.“