Frjáls verslun - 01.09.2006, Blaðsíða 76
76 F R J Á L S V E R S L U N • 9 . T B L . 2 0 0 6
Sænsk-íslenska viðskiptaráðið var stofnað í júní árið 1997. Um 40 fyrirtæki og einstaklingar úr ýmsum greinum atvinnulífsins voru
stofnfélagar og á árunum níu hefur félögum fjölgað jafnt og þétt. Í
dag eru félagsmenn um 65.
Jafet S. Ólafsson, framkvæmdastjóri VBS fjár-
festingabanka hf., er formaður ráðsins. „Ég hóf
að starfa fyrir ráðið þegar það var stofnað. Meg-
inástæðan var og er samband VBS við Carne-
gie-fjárfestingabankann, en VBS er umboðsaðili
þess ágæta fyrirtækis á Íslandi.“ Jafet hafði verið
varaformaður um nokkurn tíma en settist í for-
mannssætið þegar þáverandi formaður fluttist til
útlanda fyrir tveimur árum. „Þetta er ekki mikið
starf,“ segir hann.
Markmið ráðsins er að stuðla að persónulegum samskiptum
íslenskra og sænskra athafnamanna, leiða saman fyrirtæki í svipuðum
atvinnurekstri, veita upplýsingar um fyrirtæki og vörur í löndunum
tveimur, kynna ræðumenn sem eru leiðandi á sínu sviði í atvinnu-
lífi hvors lands og stuðla að viðskiptatengslum með viðskiptasendi-
nefndum, málþingum og sýningum. „Sendiherra okkar í Stokkhólmi
er boðinn og búinn til að aðstoða við að greiða fyrir viðskiptum
og það sama má segja um hinn dugmikla sænska
sendiherra sem nú er hér á landi.“
Jafet nefnir að helstu verkefni ráðsins séu að
standa fyrir tveimur fyrirlestrum á ári sem tengjast
viðskiptum við Svíþjóð. „Einnig hefur ráðið komið
að opnun Carnegie-listsýningarinnar og aðstoðað
sænska sendiráðið við viðburði sem sendiráðið
stendur fyrir, svo sem „sænska daga“ á Húsavík í
ágúst.“
Jafet segir að ráðið eigi aðallega samstarf við
sænska viðskiptaráðið, sendiráðin og síðan einstök fyrirtæki þar sem
félagsmenn hafa góð sambönd. Ráðið er félagi í Samtökum sænskra
viðskiptaráða erlendis.
„Forseti Íslands fór í opinbera heimsókn til Svíþjóðar árið 2000 og
var þá haldinn fjárfestingaráðstefna í tengslum við þá heimsókn; sama
var gert þegar Karl Svíakonungur kom í opinbera heimsókn hingað
til lands árið 2004.“
Fjárfestingar vekja athygli
Þegar formaðurinn er spurður út í inn- og útflutning til Svíþjóðar
segir hann að mjög halli á Ísland. „Í fyrra fluttum við inn vörur
frá Svíþjóð fyrir 25 milljarða króna en verðmæti útflutnings okkar
þangað nam einungis um 2,5 milljörðum króna.“ Jafet segir að mest
sé flutt inn af alls konar fjárfestingavörum, til dæmis í virkjanir. Þá
nefnir hann vélar, tæki og matvæli – að ógleymdum vörum sem fást
í IKEA.
„Við flytjum aðallega út sjávarafurðir til Svíþjóðar en sá útflutn-
ingur hefur dregist saman síðustu ár. Það er af sem áður var þegar
mikið var flutt út af síld til Svíþjóðar.“
Jafet segir að lítið hafi verið um beinar fjárfestingar Svía hér á
landi. Fjárfestingasjóður í eigu Wallenbergs o.fl. fjárfesti þó hér meðal
annars í laxeldi í Hraunsfirði á Snæfellsnesi. „Sú fjárfesting fór ekki
vel en Svíarnir voru ekkert að harma það. Ég hlustaði á Kurt Nikolin,
einn mesta áhrifamann í sænsku viðskiptalífi, lýsa reynslu sinni af
viðskiptum við Íslendinga og hann hrósaði okkur.
Íslendingar hafa vakið töluverða athygli fyrir fjárfestingar í Svíþjóð
og er Kaupþing orðið einn af stærri aðilum þar í verðbréfaviðskiptum.
Það gekk þó ekki þrautalaust þegar Kaupþing keypti JP Nordiska;
Svíar tóku þeim beinlínis ekki fagnandi. Kaupþing er eina íslenska
fyrirtækið sem skráð er í Kauphöllinni í Stokkhólmi.
Nýlega var undirritaður samningur um samruna íslensku kaup-
hallarinnar og þeirrar sænsku og eru þá allar norrænu kauphallirnar,
nema sú norska, komnar í eitt fyrirtæki.“
Jafet bendir á að Hagar – eða Baugur – reka stórverslun bæði í
Gautaborg og Stokkhólmi og hyggja á frekari landvinninga þar.
SÆNSK- ÍSLENSKA VERSLUNARRÁÐIÐ
Hallar mikið á Ísland
„Í fyrra fluttum við inn vörur frá Svíþjóð fyrir 25 milljarða króna en
útflutningur okkar var einungis fyrir um 2,5 milljarða króna,“ segir
Jafet S. Ólafsson.
„Nýlega var undir-
ritaður samningur
um samruna íslensku
kauphallarinnar við
þá sænsku.“