Glóðafeykir - 01.04.1989, Side 13

GLOÐAFEYKIR
11
grein fyrir því, að samvinnustarf er ekki bara kaupsýsla, enda þótt á
þeim vettvangi verði samvinnufélögin að standa keppinautum sínum á
sporði.
Samvinnufélögin eru að öðrum þræði félagstnálahreyfing. Með því
að gerast félagsmenn í samvinnufélögum taka menn höndum saman
til þess að leysa sameiginlega verkefni er varða hagsmuni
félagsmannanna. Félagsmannavitundin þarf að vera til staðar. Hana
verður að efla. Nýta verður fjölmiðlatæknina til þess að vekja áhuga og
metnað félagsmanna fyrir framgangi samvinnustefnunnar. Ég held að
í dag sé sérstakur jarðvegur fyrir aukinn áhuga félagsmanna, vegna
þess að starfsemi samvinnufélaganna úti á landsbyggðinni er ein
megin forsenda byggðar í flestum héruðum.
Það er hins vegar alveg ljóst, að rekstur samvinnufélaganna verður
að geta staðist samkeppni keppinautanna. Öflugt félagsmálastarf
getur þess vegna, ef vel er á haldið, styrkt stöðu samvinnufélaganna á
viðskiptasviðinu.
Kaupfélag Skagfirðinga hefur verið í hópi stærstu kaupfélaga
landsins. Félagið hefur haft með höndum margþætta starfsemi, sem
lagt hefur grundvöll að eflingu byggðar á félagssvæði sínu, og þá ekki
síst í þéttbýliskjörnunum. Nú þegar hallað hefur undan fæti í
efnahagsmálunum hefur komið betur í ljós en áður, hversu
þýðingarmiklu hlutverki kaupfélögin gegna í efnahagslífi okkar
Islendinga. Þau eru víðast hvar sannir burðarásar byggðanna.
Nú mega samvinnumenn ekki missa móðinn þótt á móti blási. Hin
neikvæða umræða um efnahagsmálin má ekki verða til þess að draga
kjark úr mönnum. Þjóðin er að ganga í gegnum hreinsunareld
efnahagslega, eftir að þenslubólan sem mest gerði vart við sig á
höfuðborgarsvæðinu er sprungin. Nú ríður á því að vel sé haldið um
stjórnvöl í samvinnuhreyfingunni svo menn komi skipum sínum
heilum í höfn.
Ég óska Kaupfélagi Skagfirðinga til hamingju með aldarstarfið.
Megi það á nýrri öld halda áfram að vera Skagfirðingum stoð og stytta,
sannur burðarás í byggðum Skagafjarðar.