Glóðafeykir - 01.04.1989, Síða 39

GLÓÐAFEYKIR
37
formlega gengið frá henni í framhaldi af því.
Útibúið í Fljótum
Samvinnufélag Fljótamanna var stofnað 17. september 1919 að
Stórholti í Holtshreppi. Meginverkefni þess var eins og annarra slíkra
félaga að útvega félagsmönnum nauðsynjavörur og koma afurðum
bænda í verð. Það reisti snemma sláturhús og var sauðfé Fljótamanna
slátrað þar allt til 1934. Ekki var frystihús reist samtímis sláturhúsinu,
en ekki liðu mörg ár þar til því var komið upp. Arið 1934 eyðilagðist
sláturhúsið í miklu hafróti sem skall á Haganesvíkinni og sópaði burtu
sláturhúsinu ásamt fleiri mannvikjum.
Samvinnufélag Fljótamanna og Kf. Austur-Skagfirðinga stofnuðu
Kjötbúð Siglufjarðar og rak það fyrirtæki sláturhús. Þar slátruðu
Fljótamenn fé sínu á árunum frá 1934 til 1949, eða þar til þeir
endurreistu sláturhúsið í Haganesvík. Það var í notkun þar til 1973, en
síðustu þrjú árin hafði K.S. húsið á leigu.
Stór þáttur í starfsemi Samvinnufélags Fljótamanna var afgreiðsla
flutningaskipa, bæði skipa Eimskipafélagsins og ríkisskipa auk
flóabátsins Drangs, en hann kom í Haganesvík tvisvar í viku, allt til
ársins 1964. Skip Eimskipafélagsins höfðu síðast viðkomu í
Haganesvík árið 1947. Þessar skipakomur voru þeim mun
nauðsynlegri fyrir byggðarlagið, þar sem samgöngur á landi voru
erfiðar og engar langtímum saman yfir vetrartímann. Þess má geta að
þegar Skeiðsfossvirkjun var byggð á árunum 1944 og 1945 var öllu efni
til virkjunarframkvæmdanna skipað upp í Haganesvík.
Forystumenn samvinnuhreyfingarinnar gerðu sér fljótt grein fyrir
því, að smáar einingar í samvinnustarfinu voru erfiðar í rekstri og ekki
vel í stakk búnar til að mæta harðri samkeppni. Því var það, að strax
árið 1947 var í alvöru farið að ræða um sameiningu allra
samvinnufélaganna í Skagafirði.
En svo liðu 20 ár, þar til umræðan fór aftur í gang. Þá hófust
viðræður um sameiningu K.S. og Samvinnufélags Fljótamanna. Var
tillaga um það felld í allsherjaratkvæðagreiðslu um málið 1969.
Nokkru síðar var á ný farið að ræða um sameiningu K.S. og
Samvinnufélags Fljótamanna. Opnaði K.S. verslun í Haganesvík