Glóðafeykir - 01.04.1989, Síða 59

GLOÐAFEYKIR
57
sótti kirkju sína af engu minni kostgæfni en áður. Á hverjum degi las
hann í heilagri ritningu, trúði því í fyllstu einlægni að þar væri allt ritað
Fingri Guðs og var á einskis manns færi að deila við hann á þeim
vettvangi.
Þeir, sem best þekktu Sigurð Þórðarson á Egg, munu lengi minnast
hans sem hins mikla atorkumanns og góða drengs.
(I 10. og 11. h. Glóðaf., 1969 og 1970, er langt og greinargott viðtal
við Sigurð á Egg níræðan).
Margrét Gísladóttir, húsfreyja á Sauðárkróki, andaðist 19. jan.
1978.
Hún var fædd á Illugastöðum í Flókadal 22. júlí 1896, dóttir Gísla
bónda þar o.v., Olafssonar bónda á Deplum í Stíflu, Guðmundssonar
bónda á Þverá í Olafsfirði, Þórðarsonar, og
konu Gísla Hugljúfar Jóhannsdóttur bónda
á Þorgautsstöðum í Stíflu, Jóhannessonar,
en kona Jóhanns og móðir Hugljúfar var
Jóhanna Jónsdóttir frá Hrauni, Þórðarsonar.
Fyrstu árin var Margrét með foreldrum
sínum, en er hún var á 5. ári varð að leysa upp
heimilið sakir hastarlegar augnveiki móður
hennar, er leiddi til algerrar blindu. Fór þá
Margrét að Móskógum til frænku sinnar,
Margrétar Kjartansdóttur og eiginmanns
hennar, Stefáns Jóhannssonar, er þarbjuggu
lengi, og naut þar hins besta atlætis. Innan
við fermingu var hún lánuð sem léttastúlka í
fjarlæga sveit. Þar leið henni illa, andlega
jafnt sem líkamlega, munaðarlausu barni,
órafjarri öllum, sem hún þekkti og þótti vænt
um. Er frétt barst um þar, hversu ástatt var um barnið, var Margrét
þegar sótt. Dvaldist hún eftir það á ýmsum stöðum ytra þar í Vestur-
Fljótum, oftast með foreldrum sínum.
Innan við tvítugsaldur réðst Margrét að Hólum í Hjaltadal. Þar
kynntist hún Valdimar Guðmundssyni frá Ási í Hegranesi, er þá
stundaði nám við Hólaskóla. Þau felldu hugi saman og gengu í
hjónaband 22. júlí 1916, á 20. afmælisdegi Margrétar. Þau eignuðust
Margrét
Gísladóttir