Glóðafeykir - 01.04.1989, Page 79

GLOÐAFEYKIR
77
Guðrún ólst upp í foreldrahúsum, yngst af 12 systkinum, er upp
komust. Hún var fædd handarvana, og hefði því að óreyndu mátt ætla,
að hún væri eigi til stórræða fallin, En Guðrún var, sem þau systkini
öll, gædd mögnuðum viljastyrk, miklu þreki og æðruleysi. Varð eigi
séð að hana brysti áræði né dugnað til að
takast á við og inna af hendi sem ófötluð væri
hvers konar verkefm sem var, enda þótt
vinstri höndina vantaði. Vöktu vinnubrögð
hennar fyrr og síðar undrun manna og
óskoraða aðdáun.
A unglingsárum stundaði Guðrún nám í
Kvennaskólanum í Reykjavík í tvo vetur,
hinn þriðja í Flensborgarskóla og lauk
kennaraprófi 18 vetra gömul. Næsta vetur
var hún kennari á Stóra-Hrauni syðra, en
hvarf svo norður hingað í átthagana og
kenndi í Lýtingsstaðahreppi til vors 1927, er
hún fluttist til Sauðárkróks og kenndi þar
næstu 4 árin. Upp frá því stóð heimili hennar
lengstum á Sauðárkróki, enda þótt hún væri
langdvölum við kennslu annars staðar. Hún
var kennari í Skarðshreppi 1931-1937, þá í Staðarhreppi allt til 1956, er
hún lét af föstu kennslustarfí og hafði þá verið kennari í 48 ár óslitið,
allt frá hausti 1908. Og eigi hvarf hún þá með öllu frá kennslu, því að
enn stundaði hún um hríð einkakennslu á Sauðárkróki, þar sem hún
settist nú um kyrrt og bjó í húsi sínu næstu 12 árin. Guðrún var talin
góður og mikilhæfur kennari, jafnvíg á kennslugreinar, þ.á.m.
handavinnu, enda sjálf mikil hannyrðakona, enda þótt einhend væri.
Hún naut virðingar og vinsælda nemenda sinna og þess vegna, m.a.,
reyndist kennsla hennar svo farsæl sem raun bar vitni.
Árið 1925 giftist Guðrún Pétri á Syðra-Vatni á Efribyggð
Guðmundssyni bónda þar, Björnssonar bónda á Mallandi ytra á
Skaga o.v., Guðmundssonar, og konu Guðmundar, Önnu
Jóhannesdóttur bónda í Neðra-Lýtingsstaðakoti (nú Árnesi),
Jónssonar bónda á Syðra-Vatni, Jónssonar, og konu Jóns, Guðrúnar
Vigfúsdóttur. Fyrst voru þau Guðrún og Pétur í húsmennsku á Syðra-
Vatni, en fluttu brátt til Sauðárkróks. Stundaði Pétur bifreiðaakstur
en Guðrún kennslu, sem fyrr var greint. Þau slitu samvistum árið 1931,
barnlaus.
Guðrún
Sveinsdóttir