Skírnir - 01.09.1993, Qupperneq 8

Frá ritstjórum
Skáld SkÍrnis er að þessu sinni Vilborg Dagbjartsdóttir og eru þrjú ljóð
hennar birt í heftinu. Einnig kynnir Skírnir vestur-íslenskan samtíma-
höfund, Bill Holm, með þýðingu á sögu hans „í garðinum". Svava
Jakobsdóttir á í heftinu ítarlega ritgerð um „Grasaferð" Jónasar Hall-
grímssonar. Haustið 1989 fjallaði Helga Kress um þessa sögu í Skírni og
hafa ritstjórar fengið mikil viðbrögð við þeirri ritgerð. Svava nálgast
„Grasaferð" úr annarri átt og verður æ ljósara hversu margslungið lista-
verk þessi saga Jónasar er - einmitt vegna þess að merking hennar er ekki
(lengur) augljós.
Islenskt samfélag þarfnast upplýsingarumræðu. Til að styrkja fræði-
legan grunn slíkrar umræðu birtast hér þrjár lykilgreinar eftir Immanuel
Kant, Michel Foucault og Jurgen Habermas. Magnús D. Baldursson set-
ur þessar greinar í sögulegt samhengi og tengir þær hræringum sam-
tímans í inngangsritgerð sinni. Upplýsingin er raunar einnig til umræðu í
Skírnismálum Ævars Kjartanssonar um ljósvakamiðla.
Jafnframt snertir Ævar á spurningum um lýðræði og það gerir einnig
Jón Hjartarson í grein um vægi atkvæða eftir landshlutum. I öðrum
Skírnismálum fjallar Sigurjón Baldur Hafsteinsson um áhrif sjónvarpsins
og andmælir viðhorfum sem fram komu í grein Sigurðar A. Magnússon-
ar í Skírni 1990. Deilan um sagnfræði og sannleika heldur áfram í grein
Þorsteins Siglaugssonar.
I ritgerðinni „Skírnisleikur og Freysmál" færir Terry Gunnell rök
fyrir leikrænum uppruna eddukvæðisins Skírnismála og tengir það forn-
norrænum helgisiðum. Sigurður A. Magnússon ber saman hugmynda-
heima Jobsbókar í Gamla testamentinu og gríska harmleiksins Próme-
þeifs og rekur frá þeim strauma til nútímans.
í Greinum um bækur tekur Gísli Ágúst Gunnlaugsson til athugunar
nýlegar bækur um tengsl íslendinga og nasismans, Kristján Árnason
fjallar um nýjustu ljóðabók Þorsteins frá Hamri og Árni Bergmann
kannar nýjar bækur um lífshlaup þriggja skálda.
Myndlistarmaður Skírnis er nú Jóhannes Jóhannesson og rýnir
Aðalsteinn Ingólfsson í mynd hans Landnám.
Að lokum ber að geta þess að Jón Karl Helgason hefur starfað með
okkur að ritstjórn þessa heftis.