Skírnir - 01.09.1997, Page 209
SKÍRNIR
TUNGUMÁLAKENNSLA Á ÍSLANDI
483
ið, sem kominn er tími til að við skilgreinum alveg skýrt. Hvergi
er ljóst hvers konar fólk við erum að „búa til“ með náminu og
fyrir vikið er hætta á að námið sem í boði er verði tilviljanakennt.
Hvað á manneskja sem er með B.A.-próf í tungumáli að kunna
og geta? I það minnsta verður hún að geta talað, skrifað og skilið
tungumálið sem lögð er stund á, auk þess sem hún verður að
kunna skil á menningu þess. Slíkt gerist ekki án dvalar erlendis.
Segja má að grunnskólakennarar geti verið ánægðir með það
aðhald og þá hvatningu sem samræmd próf 10. bekkjar veita. Nú
er ekki lengur leyndarmál hvaða skóli kemur best út og því hvet-
ur það kennara til að leggja sérstaka rækt við nemendur sína.
Sama er ekki hægt að segja um framhaldsskólastigið. Til allrar
hamingju hafa nefndir innan menntamálaráðuneytisins þó unnið
markvisst að samræmdri námsskrá fyrir framhaldsskóla. Það er
fyrsta skrefið í átt til betra náms og vonandi fylgja samræmd próf
í kjölfarið. í dag er það svo að framhaldsskólar hafa ekki samráð
sín á milli um námskröfur og er alfarið undir kennurum hvers
skóla komið til hvers þeir ætlast af nemendum sínum. Ekki er
endilega tekið eftir áhugasömum og góðum kennara sem gerir
miklar kröfur og smitar nemendur af áhuga og vinnusemi. Latur
og leiður kennari getur á sama hátt leyft sér að gera litlar kröfur
án þess að eftir því sé tekið; á þetta sérstaklega við í skólum þar
sem er einungis einn kennari í hverri grein. Því er nauðsynlegt að
kennarar og nemendur njóti ytra aðhalds svo alþjóðlegar kannan-
ir komi okkur ekki framvegis í opna skjöldu.
Góð leið til að skapa slíkt aðhald er að halda alþjóðleg próf í
greinunum og má nefna í því sambandi samtökin ALTE (Associ-
ation of Language Testers in Europe), sem bjóða upp á alþjóðleg
próf í dönsku, ensku, spænsku, þýsku, frönsku, ítölsku, hol-
lensku, portúgölsku og katalónsku. Prófin eru haldin tvisvar á ári
að jafnaði og er gefinn kostur á mismunandi þyngdarstigum. Með
því að láta nemendur þreyta þessi próf tryggjum við alþjóðlegan
mælikvarða við menntastofnanir okkar og hleypum metnaði jafnt
í kennara sem nemendur.
Síðastliðið vor voru haldin alþjóðleg próf í spænsku og
þreyttu þau nokkrir tugir áhugasamra nemenda úr Menntaskól-
anum í Reykjavík, Menntaskólanum við Hamrahlíð, Fjölbrauta-