Tímarit Máls og menningar - 01.02.2010, Blaðsíða 4

4 TMM 2010 · 1
Ingibjörg Sólrún Gísladóttir
Háskaleg og ósjálfbær
samfélagstilraun
Tvennt er öðru fremur nauðsynlegt á Íslandi í dag. Annars vegar skipu­
legt og málefnalegt uppgjör við „íslenska efnahagsundrið“ og allt sem
því fylgdi, og hins vegar víðtæk sátt um að gera allt sem í okkar valdi
stendur „… til að gera landið sem lífvænlegast með því að hlúa að öllu
því sem gerir fýsilegra að vera hér …“1 Málefnalegt uppgjör er forsenda
þess að aðgerðir okkar til að laga stöðuna í dag verði markvissar og geti
nýst okkur til framtíðar. Þegar við tökum stefnuna til framtíðar verðum
við fyrst að horfast í augu við að það verður ekkert eins og það áður var.
Hið meinta „góðæri“ kemur aldrei aftur. Sá sem hefur lifað áhættulífi og
veikst í kjölfarið getur ekki snúið aftur til fyrri lífshátta ef hann vill eiga
framtíð fyrir sér. Hann þarf að taka líf sitt til endurmats og eins verðum
við sem samfélag að meta hverju við þurfum að breyta í lífsháttum
okkar.
Skýrsla rannsóknarnefndar Alþingis um hrun íslenska fjármálakerf­
isins er mikilvægt innlegg í það uppgjör sem hér mun fara fram og það
styttist vonandi óðum í að hún líti dagsins ljós. Meginhlutverk rann­
sóknarnefndarinnar er „að safna upplýsingum um staðreyndir máls­
ins, draga upp heildarmynd af aðdraganda að falli bankanna og svara
þeirri spurningu hverjar hafi verið orsakir þess. Þá skal nefndin leggja
mat á hvort um mistök eða vanrækslu hafi verið að ræða við fram­
kvæmd laga og reglna um fjármálastarfsemi á Íslandi og eftirlit með
henni og hverjir kunni að bera ábyrgð á því.“2 Nauðsynlegt er að nefnd­
in njóti fulls trausts í störfum sínum og allir sem hlut eiga að máli skilji
mikilvægi þess fyrir einstaklinga og samfélag að gert sé upp við atburði
undanfarinna missera og ára af heiðarleika og sanngirni. Sjálf hef ég
upplýst nefndina um allt sem ég veit sannast og réttast og held að gagni
mætti koma. Eins og allir sem hafa mikið umleikis hef ég örugglega ein­
hvern tíma misstigið mig í mínum verkum og tekið rangar ákvarðanir.