Tímarit Máls og menningar - 01.09.2005, Blaðsíða 4

r
Frá ritstjóra
Barnamenningarheftið síðast fór yfirleitt vel í lesendur, aðeins einum bréfrit-
ara fannst varhugavert að fara út á braut þemahefta, þau ættu ekki eins vel
við nú og áður fyrr. Væri gaman að vita hvað öðrum lesendum finnst um það.
Öðrum lesanda fannst fráleitt að gefa út sérstakt barnamenningarhefti án þess
að minnast H.C. Andersens.
Langmesta athygli í heftinu vöktu brotin úr dagbókum Stefáns Jónssonar og
vísa ég nánari umfjöllun um þau í þáttinn Á líðandi stund hér í heftinu. Strax
þarf þó að biðja lesendur að bæta inn í texta sem féll niður á bls. 5, frá 12. línu
að neðan. Heil er setningin svona: „Hitt veit ég, að margt af því er sjálfum mér
að kenna sem fram við mig hefur komið. Það sem verst hefur farið með mig
er þessi óttalega minnimáttarkennd sem ég hef þjáðst af frá því ég man eftir
mér.“
Annarri leiðréttingu þarf að koma á framfæri frá Ásu Richardsdóttur,
framkvæmdastjóra fslenska dansflokksins, við grein Sesselju G. Magnúsdótt-
ur í síðasta hefti um dansverkið Open Source. Ása segir: „Það er ekki rétt að
frumsýningu verksins hafi verið flýtt um tvo mánuði, henni var flýtt um tvær
vikur. Það var ákveðið, að mig minnir um miðjan janúar, einum og hálfum
mánuði fyrir frumsýningardag 27. febrúar.-Auðvitað er ekki gott að gera slíkt,
en keðjuverkun vegna frestunar hjá Leikfélagi Reykjavíkur leiddi til þessa. Það
er samt grundvallarmunur á tveim vikum og tveim mánuðum og finnst mér
leitt að lesendur TMM haldi að íslenski dansflokkurinn ástundi slík vinnu-
brögð.“
Páll Baldvin var ánægður með margt í heftinu í umsögn sinni í DV, meðal
annars dagbækur Stefáns og ljóð Gerðar Kristnýjar: „Þá á sænskur leikstjóri
[Tove Appelgren] skynsamlega og þarfa grein í heftinu um leikhús fyrir börn
sem leikhússtjórar landsins mættu lesa upphátt þrisvar sinnum á björtum
sumarnóttum næstu vikur svo þeim skiljist erindið. Hún er fágæt svo athyglis-
verð umræða um leikhús fyrir börn.“
Sigríður Arnlaugsdóttir er hæstánægð með heftið, einkum grein nöfnu sinn-
ar Pétursdóttur um kvikmyndir: „Ég held að menntamálaráðherra þyrfti að
lesa hana,“ segir hún í bréfi sínu. „Kvikmynd er afar sterkur miðill. Börn venj-
ast á að horfa á þær löngu áður en þau læra að lesa, og eftir því sem þau eru
yngri því einfaldara þarf efnið að vera, og hvað er þá einfaldara en bandarískt
formúludrull. Enda ekkert annað á boðstólum. Síðan þroskast þau áfram með
sömu bandarísku ástar-formúlu-væmnina fram í rauðan dauðann. Það veitir
ekki af fleiri svona greinum.“
Stórar fréttir þessa haustdaga eru þær að Tímaritið er komið á netið: www.
tmm.is og þakkar TMM örlátum auglýsendum og Hugrúnu H. Kristjánsdótt-
ur hönnuði innilega fyrir ómetanlega aðstoð við það. Á heimasíðunni verður
til dæmis hægt að birta bréfin frá ykkur óstytt eða að minnsta kosti lengri en
hægt hefur verið hér á þessum stað. Svona fleygir öllu fram!
Silja Aðalsteinsdóttir
^ökasafíí^.
2 \ TMM 2005 • 3