Þjóðmál - 01.03.2020, Blaðsíða 36

34 ÞJÓÐMÁL Vor 2020
Hlutverk leiðtoga að vekja von
Hér á landi fóru flestir bjartsýnir inn í nýtt ár
og enginn gat séð þetta fyrir. Er einhver leið að
undirbúa sig fyrir svona aðstæður?
„Við sem samfélag erum mun betur búin
undir svona heldur en mörg önnur ríki, í
það minnsta í efnahagslegu tilliti. Svo er
samfélagsgerðin mjög sterk hér á landi eins
og við höfum séð undanfarið,“ segir Þórdís
Kolbrún.
„Þar skiptir stjórn efnahagsmála á liðnum
árum máli. Hún hefur oft sætt gagnrýni, til
dæmis að ekki hafi verið ráðist nægilega
í uppbyggingu innviða. Það hefur verið
hagvöxtur á liðnum árum og því ekki þörf á
því sem hagstjórnartæki að ríkið sé að standa
í stórum framkvæmdum. Við höfum lagt
áherslu á að greiða niður skuldir og erum því
mun betur stödd en mörg önnur ríki.“
Þórdís Kolbrún segir stjórnmálamenn þó
alltaf þurfa að vera tilbúna fyrir aðstæður
sem þessar, jafnvel þótt þær eigi sér engin
fordæmi.
„Í öllum erfiðum aðstæðum rifjast upp fyrir
manni af hverju maður fór út í stjórnmál. Þrátt
fyrir að maður sé að taka erfiðar ákvarðanir,
hafi áhyggjur af ýmsum málum og finni til
mikillar ábyrgðar eru líka ákveðin forréttindi
fólgin í því að fá tækifæri til að vera í forystu
á tímum sem þessum. Það reynir auðvitað á
karaktereinkenni stjórnmálamanna líkt og
hjá öðru framlínufólki,“ segir Þórdís Kolbrún.
„Hlutverk leiðtogans er að skilgreina stöðuna
rétt og vera heiðarlegur með það. En það er
líka hlutverk leiðtoganna að vekja von hjá
fólki, minna á það sem gert er vel og það sem
við höfum. Við munum komast í gegnum
þetta og ég tel að eftir þetta getum við
skilgreint upp á nýtt hvað sterkt samfélag er.
Við vitum ekki hvernig þetta endar og við
erum alls ekki komin yfir þetta en mér finnst
við vera að sýna margar hliðar sem sterkt
samfélag og mögulega í krafti þess hvað við
erum smá.“
Hvað þá helst?
„Til dæmis með samstöðunni sem ríkir í
samfélaginu; samkenndin er sterk og ekki
sjálfgefin. Við erum með sterkt velferðar-
samfélag og sterka innviði. Við erum með
kerfi og stofnanir sem tala saman og
boðleiðir eru stuttar. Við erum að taka utan
um þetta með öflugri hætti en mörg önnur
ríki,“ segir Þórdís Kolbrún.
„Við sem erum hægra megin í stjórnmálunum
höfum stundum setið undir þeirri gagnrýni
að vera með atvinnulífinu í liði á kostnað
velferðarkerfisins. Mér finnst núverandi
aðstæður þó sýna hversu mikilvægt það er
að hafa hér öflugt atvinnulíf og um leið sterkt
velferðarsamfélag. Við viljum að fólk hafi
athafnafrelsi og við viljum verðmætasköpun
í landinu. Öflugt atvinnulíf, og sú verðmæta-
sköpun sem þar fer fram, er forsendan fyrir
sterku velferðarkerfi. Og sterkt velferðarkerfi
er ein af forsendum öflugs samfélags. Þannig
er það alveg skýrt að samfélag þrífst ekki
án atvinnulífs. Þetta hafa hægrimenn lagt
áherslu á en blasir nú við öllum.“
„Við sem erum hægra megin í stjórnmálunum höfum stundum
setið undir þeirri gagnrýni að vera með atvinnulífinu í liði á
kostnað velferðarkerfisins. Mér finnst núverandi aðstæður þó
sýna hversu mikilvægt það er að hafa hér öflugt atvinnulíf
og um leið sterkt velferðarsamfélag.“