Þjóðmál - 01.03.2020, Side 76

74 ÞJÓÐMÁL Vor 2020
Afnám haftanna -
Samningar aldarinnar?
Útgefandi: Almenna bókafélagið
Höfundur: Sigurður Már Jónsson
Í þessari stórfróðlegu bók fer Sigurður Már
Jónsson, fv. upplýsingafulltrúi ríkisstjórnar innar,
yfir hvað raunverulega gerðist á bak við
tjöldin í aðdraganda þess að samið var við
kröfuhafa. Lýst er aðferðafræði, vinnubrögðum
og árangri samningamanna og farið yfir
mótleiki erlendra viðsemjenda. Lýst er átökum
innan íslensku stjórnsýslunnar og hvers vegna
leita varð út fyrir stjórnkerfið eftir aðstoð. Þá
er fjallað er um hvernig sumir Íslendingar
snérust á sveif með erlendum vogunar-
sjóðum og hve hagsmunir þeirra sem sátu í
skilanefndum og slitastjórnum föllnu bankanna
fóru illa saman við hagsmuni þjóðarinnar.
Bókin er afrakstur rækilegrar heimildavinnu
þrautreynds blaðamanns og ritstjóra, þar
sem rætt var við á fimmta tug manna sem
komu að málinu á ýmsum stigum en ein-
nig er stuðst við áður óbirt trúnaðargögn
og leyniskjöl. Niðurstaðan er einstæð bók
um einstæða samninga sem gjörbreyttu
fjárhagsstöðu þjóðarinnnar.
Þjóðmál birtir hér stuttan kafla úr bókinni.
Skundað á Þingvöll
Sigmundur Davíð Gunnlaugsson forsætis-
ráðherra vildi að hópurinn sem vann að
haftaafnáminu myndi hittast sem fyrst og
kaus að hafa dálitla athöfn í kringum það.
Engan stað vissi hann betri til þess en bústað
forsætisráðherra á Þingvöllum. Hann er
hugsaður sem sumarbústaður ráðherrans og
einkaafdrep hans. Mjög er misjafnt hve mikið
forsætisráðherrar nota Þingvallabústaðinn en
Sigmundur Davíð kunni vel við sig þar. Hann
sótti því gjarnan þangað og hélt þar ýmsa
fundi. Þar hittust til dæmis helstu ráðgjafar
hans varðandi Leiðréttinguna. Forsætis-
ráðherra taldi að staðurinn efldi samstöðu og
bauð því öllum hópnum þangað í kvöldverð
um miðjan júní. Gestir voru boðaðir klukkan
19 og fljótlega hélt Sigmundur Davíð stutta
ræðu þar sem hann brýndi fyrir þeim mikil-
vægi þess að gefa ekkert eftir í þeirri baráttu
sem framundan var. Hann greip til samlíkingar
við lest sem brunaði áfram í átt að gili og
myndi hún steypast ef hún færði sig ekki yfir
á aðra teina. Björgunin gæti falist í falinni
brú sem bera myndi lestina inn á nýja braut.
Fundarmenn skildu samlíkinguna enda
dró hann ekki dul á að efnahagsleg velferð
þjóðarinnar ylti á því að þeim tækist vel til í
vinnunni framundan.
Þetta var kvöld eins og þau gerast fegurst í
þjóðgarðinum. Eftir ræðu forsætisráðherra
gengu gestir út fyrir og nutu útsýnis og
veðurblíðu með glas í hendi.
Bókakynning