Árbók VFÍ/TFÍ - 01.06.2011, Blaðsíða 9
FORMÁLAR
ÁVARP FORMANNS VFÍ
Sameining Stéttarfélags verkfræðinga og Verkfræðingafélags Islands er
það sem borið hefur einna hæst í félagsstarfi okkar á liðnu ári.
Stofnfundur sameinaðs félags fór fram 31. maí sl., en áður höfðu farið
fram kosningar í félögunum þar sem sameining var samþykkt með
miklum meirihluta atkvæða í báðum félögum. Á stofnfundinum var ný
stjórn kjörin og þar hlaut ég stuðning félagsmanna til þess að gegna
formennsku í sameinuðu félagi á nýju starfsári. Það traust þakka ég
fyrir og verkefninu mun ég leitast við að sinna af kostgæfni.
Verkfræðingafélag íslands stendur ekki aðeins á tímamótum sem sameinað félag
verkfræðinga, heldur styttist nú í aldarafmæli félagsins, en félagið var stofnað 19. apríl
1912. Hópur félagsmanna hefur starfað að undirbúningi afmælisins urn nokkurt skeið og
nánari grein verður gerð fyrir viðburðum á afmælisárinu þegar nær dregur.
Á þessum tímamótum eru tækifæri til breytinga og til að efla starfið með ýmsum hætti
enn frekar. Jafnframt er þó mikilvægt að halda í þau gildi og þá þætti í starfi félaganna
sem hafa gefist vel og við viljum ekki sjá á bak.
Verkfræðin hefur þróast ört undanfarin ár og verkfræðingar takast á við æ fjölbreytilegri
viðfangsefni í störfum sínum. Nýjar verkfræðigreinar hafa rutt sér til rúms á undanfömum
árum, á sviði heilbrigðistækni, fjármála, hugbúnaðarþróunar og kerfislíffræði, svo
nokkur dæmi séu tekin. Mikilvægt er að verkfræðingar í þessum greinum, eins og þeim
hefðbundnari sem fyrir eru, finni að félagið okkar komi til móts við væntingar þeirra á
sviði faglegrar umræðu, kjaramála og í almennu félagsstarfi.
Menntun verkfræðinga er viðfangsefni sem félagið á að láta sig áfram varða, eins og VFÍ
hefur gert til þessa. Verkfræði er núna kennd við tvo háskóla á íslandi og félagið hefur
verið til ráðgjafar og umsagnar um námskröfur í verkfræði, þar sem m.a. er tekið mið af
verkfræðinámi í háskólum erlendis. Náið samstarf við háskólana um verkfræðinámið og
umræða um faglegar kröfur verður áfram lykilatriði í starfi félagsins. Unnið er um þessar
mundir að því að endurvekja starf um að kynna frekar nemendum á fyrri skólastigum
þau heillandi viðfangsefni sem verkfræðigreinarnar bjóða og þau tækifæri sem felast í
störfum verkfræðinga. Kynning á verkfræðinni á fullí erindi til nemenda á framhalds-
skólastigi og jafnvel í efstu bekki grunnskóla, til stúlkna sem pilta.
Erfitt efnahagsástand á íslandi hefur haft áhrif á framkvæmdir, verkefni og atvinnumál
verkfræðinga eins og annarra undanfarin misseri. í sumum tilvikum hafa verkfræðingar
fundið sér starfsvettvang erlendis og þar búum við að því að störf okkar eru að miklu
leyti óháð landamærum. í því umróti sem orðið hefur hafa margir verkfræðingar náð að
hasla sér völl með nýjum hugmyndum og frumkvöðlastarfi. Sameinað félag okkar mun
standa vörð um kjör og hagsmuni verkfræðinga, hvort sem þeir selja verðmæta þekkingu
sína og starfskrafta sem launþegar, stjórnendur eða starfrækja eigin fyrirtæki. Þar er
mikilvægt að félagið, jafnt og félagsmenn sjálfir, leggi áherslu á virði verkfræðiheitisins,
námsins og reynslunnar sem við búum að í störfum okkar.
Félagsmál VFÍ/TFÍ
7