Ársrit Ræktunarfélags Norðurlands - 01.01.1982, Page 55

logni. Vanti bórax á einhvern blett verða rófurnar ónýtar og
þekkjast auðveldlega úr á hreistruðum berki. Að lokinni
dreifingu þarf að herfa lauslega og sá áður en moldin þornar.
Áríðandi er að sá eins snemma vors og mögulegt er og meðan
nægur raki er, til að tryggja sem besta spírun. Miklu skiptir að
velja besta rófnaafbrigði sem völ er á. I mörg ár hafa Kálfa-
fellsrófur verið mest ræktaðar. Kostir þess stofns eru meðal
annars mikil uppskera, gott útlit og að mínum dómi mestu
bragðgæði sem ég hef reynslu af og þær eru snemmsprottnar.
Helsti gallinn er að þeim er mjög hætt við að springa, bæði í
örri sprettu og i allri meðferð. Þeim virðist hætt við rotsveppi,
en þó hef ég lítinn samanburð.
Af öðrum afbrigðum tel ég, Tröndersk Hylla, einna best.
Síðustu árin hef ég ræktað sjálfur fræ af Kálfafellsrófum. í
plasthúsum er það auðvelt.
Hæfilegt er að sá í hektara ca. 500-700 grömmum af fræi,
breytilegt eftir jarðvegi og rakastigi.
Nú síðustu árin hefur verið á markaði allgott lyf við kál-
maðki, Oftanol, í smákornóttu formi. Fræinu og lyfinu er
blandað saman og sáð með sáðhjóli. I hektarann hef ég notað
25-30 kg. Oftanol er nokkuð dýrt, eða um 115 kr. kílóið 1982.
Það er hins vegar mjög virkt og auðvelt í meðförum. Oftanol
er í X hættuflokki og þarf sérstakt eiturefnaleyfi til að mega
kaupa og nota það. Sé garðurinn þurr, er gott að valta með
léttum valta strax eftir sáningu.
Frá sáningu og fram að upptöku þarf lítið að gera, stundum
að grisja og fylgjast með illgresi. Ég hef enga reynslu af notkun
arfalyfja. Skepnur mega alls ekki komast í garðinn, fáeinar
kindur geta valdið stórtjóni á stuttum tíma, komist þær í
garðinn meðan plönturnar eru litlar. Mjög breytilegt er eftir
árferði hvenær hægt er að hefja upptöku. í góðum árum, eins
og 1978 og 1980 voru komnar góðar sölurófur um miðjan
ágúst, en venjulega hefst upptaka hjá mér ekki að ráði fyrr en
upp úr 20. september. Sé haustið hlýtt, spretta rófurnar ört.
Hins vegar er mikil áhætta að draga upptöku, í von um meiri
uppskeru. 1 byrjun október 1981 fór mikið af rófum undir
snjó. 1 maí 1982 náði ég hluta af þeim upp óskemmdum.
57