Árbók Landsbókasafns Íslands - 01.01.1946, Side 65

ÍSLENZK LEIKRIT 1645 — 1946
65
Næst á eftir þýðingunum tveimur kemur nú fram frumsaminn leikur eftir síra
Einar Hálfdanarson á Kirkjubæjarklaustri. Leikurinn heitir: Gestur og garðbúi og er
til í tveimur uppskriftum. Leikurinn getur ekki verið saminn fyrr en nokkru eftir
1720, þegar síra Einar tekur við prestsþj ónustu á Kirkjubæjarklaustri, því leikurinn
á í aðra röndina að sýna „orð- og talshætti eystra og syðra“, eins og Sighvatur Borg-
firðingur segir í Prestaævum. Við lauslega yfirsýn virðist mér það vel geta átt við
þetta leikrit eins og hið næsta í röðinni, að það sé að nokkru leyti samið upp úr ein-
hverri leikskemmtun, sem skólapiltar hafa haft í sínum hópi. Síra Einar Hálfdanarson
var brautskráður úr Hólaskóla 1715, en næsti leikritahöfundur, síra Snorri Björnsson,
úr Skálholtsskóla 1733, og verður leikrit hans, „Sperðill“, tímasett með nokkurri vissu
nálægt 1760. Þá er komið inn á slóð, sem rakin hefur verið annars staðar,* og verð-
ur látið staðar numið hér.
Segja má, að íslenzk leikritun hafi farið smátt af stað, en samt er hún orðin all-
mikil að vöxtum. Vafalaust munu margir telja, að ég hafi tínt til ýmislegt í skrá
þessa, sem jafnvel höfundana óraði ekki fyrir að talið yrði til leikbókmennta. Það
hefur heldur ekki verið sjónarmið mitt, að telja fram bókmenntalegar innstæður einar,
heldur miklu fremur að hafa í teigi allt, sem hefði leiksögulega þýðingu. Verði samt
glompur í skránni, vildi ég mega fylla þær síðar, en þigg með þökkum, að aðrir
geri það.
Lárus Sigurbjörnsson.
* Sjá einkum: Lárus Sigurbjörnsson: Upphaf leiklistar í Reykjavík, Þættir úr sögu Reykja-
víkur, 1936, og Steingrímur J. Þorsteinsson: Upphaf leikritunar á Islandi, 1943.
5