Morgunblaðið - 08.12.2001, Blaðsíða 6

FRÉTTIR
6 LAUGARDAGUR 8. DESEMBER 2001 MORGUNBLAÐIÐ
ÁTJÁN fatlaðir einstaklingar, sem unnið hafa í vinnustofu
fatlaðra í Ásgarði í Lækjarbotnum, eru nú verkefnalausir
um óákveðinn tíma þar sem vinnustofan brann á fimmtu-
dagskvöld. Þór Ingi Daníelsson, forstöðumaður Ásgarðs,
segir fólkið sem aðallega hefur unnið við framleiðslu leik-
fanga og trémuna, nú allt vera atvinnulaust auk fjögurra
starfsmanna sem hafa haft umsjón með starfseminni en
Ásgarður er verndaður vinnustaður.
„Það veit enginn hvað verður um þetta fólk og það hefur
ekki að neinu að hverfa, það eru engin önnur störf í boði.
Menn eru slegnir og sorgmæddir en við erum að reyna að
peppa hver annan upp, ætlum að bretta upp ermarnar og
byrja aftur. Það þýðir ekkert að gefast upp en hvernig
þetta fer allt saman verður bara tíminn að leiða í ljós –
starfseminni er sjálfhætt í bili,“ segir Þór Ingi en hann
fundaði með starfsfólki sínu síðdegis í gær. Hann segir
það verða mjög erfitt fyrir fötluðu starfsmennina átján ef
starfsemi kemst ekki af stað bráðlega því auk tekjumissis
sé starfið ekki síður mikilvægt til að rjúfa félagslega ein-
angrun margra starfsmannanna. „Fötluðu starfsmenn-
irnir eru á örorkubótum og geta því ekki sótt um atvinnu-
leysisbætur. Launin sem við greiðum þeim eru ekki há en
það munar að sjálfsögðu um tekjumissinn. Ég á von á því
að við borgum þeim því áfram laun en það er félagslegi
þátturinn sem er þeim líka dýrmætur og í raun aðalmálið.“
Húsið ekki fulltryggt
Þór Ingi segir að fyrir utan atvinnumissi starfsmann-
anna nemi beint fjárhagslegt tjón vegna brunans á milli 20
og 30 milljónum króna. „Húsið sjálft er nýlegt og sumir
hlutar þess voru enn í byggingu. Samanlagt er húsið um
210 fermetrar en öll tæki og innanstokksmunir urðu auð-
vitað líka eldinum að bráð og er gjörónýtt,“ segir Þór Ingi.
Spurður um tryggingar segir hann húsið hafa verið tryggt
en aðstandendur Ásgarðs eigi eftir að funda með trygg-
ingafélagi sínu. „Þar sem húsið var ekki heldur fullbyggt
var ekki búið að ganga frá síðustu skoðun þess og trygg-
ingarnar voru í samræmi við eldra mat á húsinu. Við erum
því að reikna með að tryggingarnar nái að dekka um þriðj-
ung tjónsins en staðan verður ljósari eftir fund með trygg-
ingafélagi okkar.“
Ásgarður er sjálfseignarstofnun sem er með þjónustu-
samning við ríkið og hefur rekið vinnustofu fyrir fatlaða
frá árinu 1993.
„Starfsemin hefur vaxið mikið á síðustu árum og við
höfum sífellt verið að stækka við húsið. Strákarnir sem
vinna hérna hafa sjálfir smíðað allar innréttingar og þeir
finna mjög fyrir þeim missi sem varð í brunanum og ekki
síst þá tilfinningalegum þar sem svo stór hluti vinnu þeirra
og tilveru er horfinn. Við stefnum að því að setja starfsem-
ina í fullan gang aftur sem fyrst en við vitum bara ekki
hvernig það getur gerst.“
Kennarar við Waldorfskólann, næstu nágranna Ás-
garðs, Lionsmenn og aðrir velunnarar Ásgarðs hafa hrint
af stað fjársöfnun til stuðnings Ásgarði svo hægt verði að
hefja endurbyggingu vinnustofunnar. Þór Ingi segir þenn-
an stuðning ómetanlegan ekki aðeins fjárhagslega heldur
veiti samstaðan einnig styrk til starfsmanna. „Við erum
mjög þakklátir og ánægðir með að finna þessi viðbrögð,“
sagði Þór Ingi Daníelsson.
Reikningur söfnunarinnar er í Íslandsbanka við Gull-
inbrú og er reikningsnúmerið 528-14-607000. Söfnunin
stendur til 31. janúar 2002.
Þá hefur verið sett upp heimasíða, þar sem veittar verða
upplýsingar um málið. Slóðin er: www.simnet.is/
asgardurhandverk.
Morgunblaðið/RAX
Hús handverksfólksins í Ásgarði er gjörónýtt og
liggur starfsemin niðri um óákveðinn tíma.
22 missa vinnuna eftir bruna
vinnustofu fatlaðra í Ásgarði
ELDINGU laust niður í eina
Fokker-flugvél Flugfélags Ís-
lands skömmu fyrir lendingu á
Reykjavíkurflugvelli í fyrrakvöld
en engin hætta var á ferðum, að
sögn Árna Gunnarssonar, sölu-
og markaðsstjóra félagsins.
Vélin var að koma frá Akureyri
og fékk eldingu í sig skammt frá
Akrafjalli. Árni Gunnarsson segir
það daglegt brauð víða um heim
að flugvélar fái eldingu í sig en
það sé ekkert sem þurfi að hafa
áhyggjur af. Vissulega komi
högg á vélina og blossi, þannig að
farþegar verði varir við þetta, en
gert sé ráð fyrir að flugvélar geti
lent í eldingum og séu því byggð-
ar með það í huga.
Í vélinni voru 39 manns. Árni
Gunnarsson segir að flugstjórinn
hafi útskýrt fyrir farþegum hvað
átti sér stað og skömmu síðar
hafi vélin lent en hún hafi verið í
notkun í gær eins og ekkert hefði
í skorist.
Eldingu laust í flugvél
MJÖG erfiðar aðstæður voru á slysstað þarsem vélbáturinn Svanborg SH fórst í gær-kveldi skammt sunnan við Skálasnagavita á
Snæfellsnesi. Fjórir voru um borð í bátnum og tókst
þyrlu Varnarliðsins að bjarga einum þeirra, en
þriggja var enn saknað þegar Morgunblaðið fór í
prentun.
Veður var mjög vont á þessum slóðum suðsuðvestan
20–25 metrar á sekúndu, slydduél og lítið skyggni.
Tugir björgunarsveitarmanna komu á slysstað í
gærkvöldi og voru á bjargbrúninni á meðan þyrlur
reyndu björgun mannanna úr bátnum.
Morgunblaðið/Alfons
Bátinn rak upp að klettóttri ströndinni og skorðaðist þar í
stórgrýti. Mikið brim var við ströndina og komust björg-
unarmenn því hvorki að bátnum af sjó eða frá landi.
Erfiðar aðstæð-
ur á slysstað
Þyrla Landhelgisgæslunnar, TF-SIF, kom til leitar upp úr kl. 21
og sést hér á bjargbrúninni fyrir ofan strandstað, skammt frá
Skálasnagavita. Þyrlur Varnarliðsins komu einnig á vettvang.