Andvari - 01.06.2011, Blaðsíða 19

ANDVARI
JAKOB BENEDIKTSSON
17
hann sig því til og kynnti sér af sama dugnaði og hann sýndi við annað nám
sitt allt, sem hann komst yfir um hernaðarlist. Þannig varð hann viðræðuhæfur
við ofurstann.7
Þarna er Jakobi vel lýst. Hann gekk einbeittur að hverju verki sem hann
tók sér fyrir hendur og skildi ekki við það fyrr en hann hafði lokið því
á þann hátt sem hann taldi viðunandi.
A árunum 1932 til 1937 var Jakob stundakennari við ýmsa fram-
haldsskóla í Kaupmannahöfn, m.a. við Schneekloths Skole frá 1935-
1937. Menntaskólakennslan hefur ekki verið fullt starf því að Jakobi
bauðst að aðstoða Christian Blinkenberg fornleifafræðing (1863-1948)
við að gefa út grískar áletranir sem fundist höfðu við uppgröft í bænum
Lindos á eynni Rhodos. Blinkenberg vann ásamt Karli Frederik Kinch
við uppgröft í Lindos á árunum 1900-1914. Mesta athygli vakti fundur
þeirra á hofkroníkunni sem talin er frá 99 f. Kr. Blinkenberg var pró-
fessor við Kaupmannahafnarháskóla 1916-1926 en helgaði sig eftir það
fornleifafræðinni. Með honum vann Jakob við áletranirnar á árunum
1933-1942 nokkra tíma á dag í loftlítilli kjallarakompu á Konunglega
bókasafninu.
Aður en vinnunni með Blinkenberg lauk varð Jakob styrkþegi Arna-
nefndar (Den arnamagnæanske kommission) í Kaupmannahöfn. Því
starfi gegndi hann frá 1939-1946. Nefndin ber nafn Árna Magnússonar
handritasafnara (1663-1730) og var sett á laggirnar 1760 til þess að hafa
umsjón með Árnastofnun (Den arnamagnæanske stiftelse). Stofnuninni
var komið á fót samkvæmt erfðaskrá Árna Magnússonar og Mette
konu hans frá 1730 en tilgangurinn var að efla rannsóknir á norrænum
málum, bókmenntum og sögu með stuðningi af handrita- og bókasafni
Árna. Meðal verkefna sem Árnanefnd ákvað að ráðast í 1939 og lagði
fé til var gerð sögulegrar orðabókar yfir forna málið frá elstu textum
og fram undir 1540.8 Þar var miðað við fyrstu bókina sem prentuð var
á íslensku, Nýjatestamenti Odds Gottskálkssonar sem gefið var út í
Hróarskeldu 1540. Stefán Einarsson prófessor við John Hopkins háskól-
ann í Bandaríkjunum var ráðinn aðalritstjóri verksins en Jakob og Ole
Widding ritstjórar. Vegna stríðsins komst Stefán ekki til Danmerkur
og sagði starfinu lausu 1942. Jakob vann við orðabókarverkið til 1946
er hann fluttist aftur til íslands en Ole Widding hélt áfram til 1977 að
hann lét af störfum vegna aldurs.
Ein af ástæðum þess að ráðist var í þetta stórvirki var sú að allt frá