Ritið : tímarit Hugvísindastofnunar - 01.10.2014, Qupperneq 377

376
Í heimi tölvupósts og Skype lifum við nú með – og við hliðina á – hvert
öðru í samskiptarými sem einkennist af tengslaþéttleika og hraða sem var
óhugsandi fyrir nokkrum árum. Scott McQuire hefur smíðað hugtakið
„tengslarými“ til þess að ná yfir hlutverk miðlunar í því að færa til „útlín-
ur“ dagsdaglegrar reynslu og félagslegs rýmis.139
Hið „firrta skyn fyrir fjarlægð í tíma og rúmi“140 sem þetta skapar
nærist á því að menn gera hversdagslega ráð fyrir tengslakerfi sem nær
þvert á þjóðlönd, eða jafnvel þvert yfir heiminn, að stórum hluta á grund-
velli reynslu sinnar af stafrænni miðlun. Mögnuð ný dæmi um tengingu og
flæði skjóta upp kollinum reglulega. Í júní 2009 voru myndir úr snjallsíma-
myndbandi af mótmælandanum Neda Agha-Soltan í dauðateygjunum úti
á götu í Tehran sendar á Twitter-aðganga og almennt internetbann í Íran
þannig sniðgengið. Eftir að myndunum hafði verið dreift víða utan Írans
skutu þær aftur upp kollinum á mótmælaspjaldi næsta dag á sömu götu og
mótmælandinn hafði látið lífið.141 Í janúar 2007 varð fjölmiðlafár vegna
rasískra athugasemda Jade Goody í garð Bollywood-leikkonu í [raunveru-
leikaþættinum] Celebrity Big Brother – sem voru komnar í dreifingu hjá
indverskum viðtakendum innan nokkurra klukkustunda gegnum YouTube
– til þess að skapa pólitískt vandræðaástand fyrir breska ráðherra sem voru
í heimsókn á Indlandi. Sambærileg dæmi má finna frá tímanum fyrir öld
stafrænnar tækni, til dæmis deilur um rasísk ummæli í lýsingu bandarískrar
sjónvarpsstöðvar á hnefaleikabardaga á Ólympíuleikunum 1988 sem gerðu
suður-kóreska áhorfendur bálreiða eftir að þeir höfðu horft á bandarískar
útsendingar sem var lekið frá einni af bandarísku herstöðvunum í land-
inu.142 Í eldra dæminu var menningarlega flæðið þó tilviljun en í tilviki
Celebrity Big Brother var tilefnið tvöfalt: Myndefnið var látið berast áfram
fyrir tilstuðlan innflytjendahópa með tengsl við heimalandið og sú dreif-
ing endurspeglaði hvernig YouTube tengir saman miðlun og viðtakendur
þvert á landamæri menningarheima. Afleiðingin af þessu er sú að við verð-
um að endurskoða kvarðann sem segir til um hversu langt efni sem er sýnt
í fjölmiðlum nær og hefur þannig áhrif.
139 Scott McQuire, The Media City, bls. 22.
140 Anthony Giddens, The Consequences of Modernity.
141 Frekari umræður má finna hjá Roger Cohen, „Iran: the Tragedy and the Fut-
ure“, New York Review of Books, 13. ágúst 2009, bls. 7–10. Stjórnvöld í Íran reyndu
í kjölfarið að loka aðgengi að síðum sem vottuðu Neda Agha-Soltan virðingu:
Guardian, 5. júní 2010.
142 James F. Larson og Heung Soo-Park, Global Television and the Politics of the Seoul
Olympics, Boulder: Westview Press, 1993.
NiCk CouldRy