Læknaneminn - 01.04.2008, Side 4

Geilo 2008
Martin Ingi Sigurðsson
5. árs læknanemi
í febrúar 2008 fór hópur frá íslandi á 18. árlegu
ráðstefnu SSRCTS (Scandinavian Society for Research in
CardioThoracic Surgery). Ráðstefnan var haldin í norska
fjallabænum Geilo sem þekktur er fyrir falleg skíðasvæði
og norska fjallastemmningu. Nokkur hefð er komin á
að íslenskir læknanemar og unglæknar sem vinna við
rannsóknir í hjarta- og lungnaskurðlækningum kynni
niðurstöður rannsókna sinna á ráðstefnunni.
Hópurinn sem kynnti rannsóknir sínar í ár samanstóð
af læknanemunum Martini Inga Sigurðssyni, Sverri Inga
Gunnarssyni og Tryggva Þorgeirssyni og kandidatinum
Hannesi Sigurjónssyni. Leiðbeinandi hópsins var Tómas
Guðbjartsson skurðlæknir. Auk þess kynnti Tómas
veggspjald frá Sæmundi Jóni Oddssyni læknanema og
Hanna Ástvaldsdóttir perfusionisti hélt erindi. Þinginu
lauk svo með „wet lab“ þar sem nemar og unglæknar
æfðu hjartalokuskipti og kransæðahjáveituaðgerðir á
svínshjörtum undir handleiðslu sérfræðinganna.
Flutningur erinda þeirra Sverris, Hannesar og Hönnu
gekk vonum framar sem og kynning veggspj alda Martins,
Sæmundar, Tryggva og Tómasar. Skíðabrekkur Geilo
svignuðu svo undan skíðahæfileikum hópsins ekki síður
en visku hans því tíminn utan ráðstefnunnar var ákaft
notaður í brekkunum. Kvöldin voru svo nýtt til þess að
efla kynnin við aðra unga vísindamenn á staðnum undir
dyggri stjórn húsbandsins Focus.
Á þinginu var Tómas kosinn nýr forseti SSRCTS og
því er skipulagning og framkvæmd þingsins í höndum
íslendinga á næsta ári. Þrátt fyrir að löng hefð sé
komin á framkvæmd þingsins verða þó gerðar nokkrar
breytingar að íslenskum sið. Ljóst er að ísland þarf að
senda á þingið stóra og glæsilega sveit á næsta ári til að
halda uppi hróðri landsins á Geilo 2009.
4
Læknaneminn