Ársrit Ræktunarfélags Norðurlands - 01.01.1982, Page 44

3. Upp frá því þarf að gæta þess að greinarnar verði ekki of
gamlar. Það er mjög mikilvægt vegna þess að gamlar
greinar bera færri og minni ber.
Sólber eiga ekki að hafa eldri greinar en 3-4 ára og rifs og
stikilsber ekki eldri en 5-6 ára. Það er auðvelt að sjá hvaða
greinar eru elstar vegna þess að börkurinn dökknar með
aldrinum og elstu greinarnar hafa dekkstan börk. Þá er átt við
neðri hluta greinanna. Einnig er unnt að sjá ársvöxt hverrar
greinar á misdökkum lit með því að skoða þær ofan frá og
niðureftir.
Best er að byrja á því að klippa burt þær greinar sem
skemmdar eru eða brotnar, síðan jarðlægar greinar og eins ef
greinar eru sýktar. Hér á landi er algengt að sjá litlar rauðar
vörtur á rifsgreinum. Það er sveppur, sem dregur úr vexti og
allar slíkar greinar á að fjarlægja. Allar greinar eru klipptar
eins neðarlega og unnt er.
Það getur verið ástæða til þess að fækka eitthvað yngri
greinum, svo að runnarnir verði ekki mjög þéttir og þarf
einkum að athuga stikilsberjarunna og grisja þá vel. Þurfi að
grisja gamla runna, sem ekki hafa verið klipptir í mörg ár, er
best að gera það á þremur árum en taka ekki allt í einu.
Stundum er erfitt að eiga við sólberjarunnana vegna þess
að greinarnar vaxa mikið út á við og svigna niður. Þá er
hugsanlegt að smíða einskonar stativ í kringum þá. Notaðir
eru listar 2,5x4,8 sm. Fjórar stengur eru reknar niður og
þverslár negldar á milli þeirra efst þannig að rammi er utan
um runnann og styður við greinarnar. Má hann ekki vera of
þröngur eða öllu ofar en um miðjar greinar. Á seinni árum
hefur tíðkast nokkuð í Noregi og víðar að rækta berjarunna
þannig að greinarnar eru bundnar upp við víra líkt og hind-
ber. Þetta er gert á litlum lóðum til þess að spara pláss en
kostar mun meiri vinnu. Er ólíklegt að þessi aðferð nái út-
breiðslu hér á landi, allra síst í dreifbýli, og verður henni ekki
lýst hér.
46