Árbók Háskóla Íslands - 01.01.1973, Blaðsíða 116

114
Árbók Háskóla ísiands
Ræða rektors Háskóla íslands, próf. dr.
Magnúsar Más Lárussonar, við afhend-
ingu Flateyjarbókar og Konungsbókar
Sæmundar-Eddu
Forseti íslands og virðulega forsetafrú,
hæstvirtu ráðherrar íslands og Danmerkur,
fulltrúar þjóðþings og gestir,
háttvirta sarnkoma.
Á þessum degi fagnar Háskóli íslands og
þjóðin öll. Hinn fagri dagur boðar, að nýtt
sumar er upp runnið og hefur í sér fólgnar
vonir og þrár, sem eigi munu bregðast —
hinn langþráði dagur, sem staðfestir
heimkomu handritanna, er á sínum tíma
voru flutt til höfuðstaðar og menningarset-
ursins sameiginlega í hinum sameinuðu
konungsríkjum Danakonungs.
Háskóli íslands er þakklátur og dáir
dirfsku hins aldna þjóðþings kjörinna full-
trúa Dana, er það hefur tekið jafn-örláta
ákvörðun í máli, sem snertir hagsmuni og
meginreglur um starfsemi safna — dáir
djörfung þess að brjóta á bak aftur venjur
og hefðir þeirra og láta laust það, sem
íslendingar hafa lagt til menningar og lista
um liðnar aldir — láta af hendi rakna það,
sem oss er dýrmætast sem þjóð.
Gömul skrif vor á bókfelli og pappír eru
oss hið dýrmætasta sem við eigum frá
liðnum tíma. En þau voru einnig dýrmæt
frændþjóðinni og reyndar frændþjóðun-
um. Vér höfum varðveitt arf með því að
festa hann í rituðu máli og flytja hann
þannig kynslóðum síðari alda. Sögur og
kvæði hafa orðið til þess að styrkja og efla
Norðurlöndin. Hugmyndir hafa styrkst og
glæðst. Og er það ekki að ófyrirsynju að
dönsk skáld og rithöfundar leituðu til þess
Mímisbrunns, er íslendingar höfðu varð-
veitt. En eigi einvörðungu dönsk skáld og
rithöfundar, heldur einnig skáld frænd-
þjóðanna. Hin gömlu skrif vor hafa styrkt
stefnu Norðurlanda og gert þeim á margan
hátt kleift að starfa saman með öðrum
hætti en tíðkast milli sjálfstæðra þjóða.
Um ísland kváðu Grundtvig og Drach-
mann og ótal aðrir, því þar situr hún gamla
Saga, fjalldrottningin fríða, íss og funa.
Fyrir hönd ríkisstjórnar og þjóðar tekur
Háskóli íslands með þakklæti við handrit-
unum — arfi sem seint mun fyrnast. Flat-
eyjarbók og Konungsbók Sæmundar-
Eddu, gjöf Brynjólfs Skálholtsbiskups
Friðriki konungi III til handa, hefur lög-
gjafinn danski ákveðið að senda heim og
séð til þess, að það yrði gert með þeim
myndarbrag, að letrað verði á spjöld sög-
unnar, sá hinn sami löggjafi, er sífellt hefur
séð til þess, að íslendingar nytu réttlætis.
Stofnun Árna Magnússonar á íslandi er
með þessari gjörð orðin að staðreynd, og
Háskóli íslands, afsprengi Hafnarháskóla,
hefur nú — sextugur — öðlast lögræði og
tekið við hinum dýra arfi, sem í hans hlut
féll — móðurarfi eftir Árna Magnússon.
Sé það góðu heilli gjört.
Háskóli íslands þakkar öllum þeim, er
stuðlað hafa að þessu verki, og er þess
fullviss, að heillaspor hafi verið stigið til
styrktar böndum þeim, er tengja þjóðir
vorar.
Hafið þökk, Danir. Guð blessi hið fagra
land yðar og veri með yður og varðveiti.
Athöfninni lauk með því að Sinfóníu-
hljómsveit íslands lék Dorisk Chaconne
eftir Pál ísólfsson.