Tímarit Máls og menningar - 01.06.1999, Qupperneq 92

ERNEST HEMINGWAY
„Ég veit þú mundir ekki hafa neitt á móti henni, Jig. Hún er ekkert til
að gera veður útaf. Það er bara til að hleypa inn lofti.“
Stúlkan sagði ekki orð.
„Ég skal fara með þér og vera hjá þér allan tímann. Þeir hleypa bara
inn loftinu og þá verður allt fullkomlega eðlilegt.“
„Og hvað gerum við svo á eítir?“
„Það verður allt í lagi með okkur á eftir. Alveg einsog það var áður.“
„Hvað kemur þér til að halda það?“
„Þetta er það eina sem amar að okkur. Það er það eina sem hefur gert
okkur vansæl.“
Stúlkan leit á stönglatjaldið, rétti út höndina og greip í tvær stöngla-
festar.
„Og þú heldur að þá verði allt í lagi með okkur og við verðum
ánægð.“
„Ég veit við verðum það. Þú þarft ekki að vera hrædd. Ég þekki
fjöldamargt fólk sem hefur gert þetta.“
„Það geri ég líka,“ sagði stúlkan. „Og eftirá var það allt svo fjarska-
lega ánægt.“
„Jæja þá,“ sagði maðurinn, „ef þú vilt það ekki þá þarftu þess ekki.
Ég mundi ekki vilja að þú gerðir það ef þú vilt það ekki. En ég veit að
það er ákaflega einfalt.“
„Og þú vilt það í raun og veru?“
„Ég held það sé það besta sem hægt er að gera. En ég vil ekki að þú
gerir það ef þú vilt í raun og veru ekki gera það.“
„Og ef ég geri það verður þú ánægður og allt verður einsog það var
áður og þú munt elska mig?“
„Ég elska þig núna. Þú veist ég elska þig.“
„Ég veit það. En ef ég geri það, þá verður allt gott aftur þó ég segi að
hlutir séu einsog hvítir fílar, og þú lætur þér það vel líka?“
„Ég mun láta mér þykja vænt um það. Mér þykir vænt um það núna
en ég get bara ekki hugsað um það. Þú veist hvernig ég verð þegar ég er
með áhyggjur.“
„Ef ég geri það muntu aldrei framar hafa áhyggjur?“
„Ég skal ekki hafa áhyggjur af því vegna þess að það er svo fjarska-
lega einfalt.“
„Þá skal ég gera það. Afþví mér stendur á sama um mig.“
90
www.mm.is
TMM 1999:2